Давлат хавфсизлик хизматининг Наманган вилояти бўйича бошқармаси ходимлари томонидан вилоят божхона бошқармаси ходимлари билан ҳамкорликда Наманган шаҳрида тезкор тадбир ўтказилди.
Тадбир давомида Учқўрғон туманида яшовчи, муқаддам Жиноят кодексининг 273-моддаси билан судланган 36 ёшли Т.Ш. шахсий тинтувдан ўтказилганида, унинг ёнида 10,6 минг доллар миқдоридаги қалбаки чет эл валютаси борлиги аниқланиб, процессуал тартибда расмийлаштириб олинган.
Терговга қадар текширув давомида у қалбаки хорижий валюталарни Янгиқўрғон туманида яшовчи 36 ёшли М.Б.дан олгани маълум бўлиб, у ҳам қўлга олинган.
Аниқланишича, Қирғизистон фуқароси бўлган Тинар исмли шахс томонидан айланма йўллар орқали Янгиқўрғон тумани ҳудудига ўтказилган ушбу қалбаки валюталар Тошкент шаҳрида муомалага чиқарилиши керак бўлган.
Ҳозирда ҳолат юзасидан Т.Ш. ва М.Б.га нисбатан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари олиб борилмоқда.
Бундан олдин Тошкентдаги банкда салкам 60 миллион сўмга айирбошланган евро тангалар қалбаки бўлиб чиққани, Тошкент вилоятида қалбаки 100 минг сўмлик купюраларни тайёрлаш билан шуғулланган оила аниқлангани, Тошкент вилоятида қалбаки 1100 долларни 500 долларга сотмоқчи бўлган шахслар ушлангани тўғрисида хабар берилганди.
Изоҳ (0)