Istanbul politsiyasi maxsus operatsiya davomida 3,6 million qalbaki yevroni musodara qildi.
Bu haqda TRT Haber telekanali ma’lum qildi.
Telekanal maʼlumotlariga ko‘ra, qalbaki valyuta muomalasiga qarshi kurash bo‘yicha operatsiya shaharning Yevropa qismidagi Fotih va Zeytinburnu tumanlarida o‘tkazilgan. Qalbaki pullarni iste’molga kiritishda gumon qilinib bir kishi qo‘lga olindi.
Ko‘zdan kechirish chog‘ida muomalaga tayyor holatda bo‘lgan qalbaki 3 million 600 ming yevro kupyuralar, moybo‘yoqlar, “100” yozuvi tushirilgan shaffof plastik blankalar, ultrabinafsha chiroq, printer va 817 dona qalbaki chek varaqlari topildi.
Turkiya Markaziy banki, o‘z navbatida, qalbaki valyuta muomalasining oldini olish bo‘yicha bir qator chora-tadbirlar ko‘rganini va tegishli tekshiruvlar olib borayotgan huquqni muhofaza qiluvchi organlar bilan hamkorlikda ishlayotganini maʼlum qildi.
“Qalbaki chet el valyutasi muomalasiga yo‘l qo‘ymaslik maqsadida pullarni sanash vositalari, ularni nazorat qilish va foydalanilayotgan bankomatlar tekshirilib, yangilanmoqda. Markaziy bank tomonidan adliya organlari bilan qalbaki valyutaga qarshi kurashish bo‘yicha ishlar muvofiqlashtirilmoqda”, deyiladi regulyator bayonotida.
Avvalroq Ispaniyada qalbaki pullar ishlab chiqaradigan yirik markaz aniqlangani haqida xabar berilgandi.
Jinoyatchilar asosan 20 va 50 yevrolik banknotalarni qalbakilashtirgan.
Markaz Andalusiya avtonom hamjamiyatidagi Kadis provinsiyasida joylashgan bo‘lgan. Laboratoriya binosi tintuv qilinganda milliy politsiya xodimlari u yerdan kompyuter va printer, katrijlar, qog‘ozlar, kesilgan gologramma chiziqlar va tayyor qalbaki banknotalar, shuningdek, 1500 yevrolik naqd pul topgan.
Izoh (0)