Божхона ходимлари томонидан республика ҳудудига ҳаво йўллари орқали қалбаки валюталарни олиб киришга уринган шахс ушланди. Бу ҳақда Давлат божхона қўмитаси матбуот хизмати хабар берди.
Маълум қилинишича, Тошкент халқаро аэропортида Истанбул–Олмаота–Тошкент йўналиши бўйича учиб келган йўловчининг багажида қалбаки 5 минг доллар борлиги аниқланган. Купюраларнинг аксариятида серия рақамлари ҳам бир хил бўлган.
Тезкор тадбир давом эттирилиб, аэропорт автотураргоҳида ва Яшнобод туманида жиноятга алоқадор бўлган шахслар ҳам қўлга олинган. Улардан бирининг Lacetti’си текширилганида яна сохта 5 минг доллар борлиги аниқланди.
Юнусобод туманида эса қалбаки пулларнинг ҳақиқий эгаси уни олаётганида қўлга олинди. Ҳозирда ҳолат бўйича жиноят иши қўзғатилди.
Бундан аввал Тошкентда қалбаки валюталар эвазига телефон харид қилиб, ўнлаб фуқароларни чув туширган шахс қўлга олингани, Сирдарёдаги банкда 81 минг евро қалбаки валюта аниқлангани ҳамда Ўзбекистонга қалбаки авторақамлар олиб кирилаётгани аниқлангани ҳақида хабар берилганди.
Изоҳ (0)