Тошкент вилоятида ноқонуний валюта савдоси билан шуғулланган шахслар қўлда олинди, деб хабар беради Бош прокуратура ҳузуридаги департамент.
Маълум қилинишича, департаментнинг Тошкент вилоят бошқармаси томонидан валюта қимматликларининг ноқонуний муомалага киритилишининг олдини олиш юзасидан тезкор тадбир ўтказилган. Тадбир давомида фуқаролар Д.У. ва Ў.М. валюта қимматликларини ноқонуний муомалага киритиш орқали даромад орттиришни кўзлаб, жами 10 минг АҚШ долларини фуқаро Д.га 107,5 миллион сўмга сотган вақтида ашёвий далиллар билан ушланган.
Мазкур ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода 3 минг долларни ноқонуний сотган фуқароларга жиноят иши қўзғатилгани, Ўзбекистонда 1 миллион долларлик яхлит купюра сотаётган шахс ушлангани тўғрисида хабар берилганди.
Изоҳ (0)