Халқ депутатлари Андижон шаҳар кенгашининг 2021 йил 17 майдаги сессиясида бир гуруҳ депутатлар тинтувдан ўтказилгани, сессияда Андижонда ер сотувчиларнинг кирдикорларини фош қилган депутат прокурор тақдимномасига кўра, дахлсизлик ҳуқуқидан маҳрум қилингани маълум қилинганди. «Дарё» мухбирининг аниқлаштиришича, дахлсизлик ҳуқуқидан маҳрум бўлган депутат 2021 йилнинг ноябрь ойида 5 йил 2 ой муддатга озодликдан маҳрум қилинган.
Жиноят ишлари бўйича Избоскан туман судининг 2021 йил 3 ноябрдаги суд ҳукмида ёзилишича, депутат Шуҳрат Каримов 2018 йилда Андижон шаҳар архитектура ва қурилиш бошқармаси архитектори А.А. билан олдиндан жиноий тил бириктириб, шаҳар ҳокимининг 2017 йил 15 июлдаги қарори асосида Alliance Road Construction МЧЖга ажратилган 4 гектар ерда қурилиш қилиш учун лойиҳа ҳужжатларини тайёрлашга киришган. Ва топографик чизмада бошқарма бошлиғи имзосини қалбакилаштириб, ер майдонини 10,7 гектарга ўзгартирган.Қайд этилишича, судланувчи жиноий ҳаракатларини давом эттириб, ўзи ва шериги А.А. билан 2018 йилнинг 31 октябрида тайёрланган қалбаки архитектура-режалаштириш топшириғи тўпламини 2020 йилнинг сентябрь ойида қурилишга доир лойиҳа ҳужжатларини ишлаб чиқиш учун «Евро Интеграл Строй» МЧЖга тақдим қилган.
Судланувчи жамиятга берилган 4 гектар ер майдонида кўп қаватли турар жой бинолари, коттеж қурилиши лозимлигини билса-да, фуқаролар И.Г., Х.Р., А.А., И.М., А.Х., М.К., А.Т., У.С., Ғ.Э. ва О.К.ларни алдаб, мазкур ер майдонига келгусида улар томонидан қуриладиган уй-жойнинг кадастр ҳужжатларини тайёрлатиб беришини айтган. Уларни ишонтириш мақсадида жамият номидан қурилиш ишларини амалга оширишга рухсат берувчи мазмундаги ишончномаларни бериб, маълум ер майдонларини сотиб юборган. Қўлга киритилган пулларни эса жамият ҳисоб-рақамига кирим қилмай шахсий эҳтиёжлари учун сарфлаган.
Суд ҳукми билан Шуҳрат Каримов Жиноят кодексининг 168-моддаси (фирибгарлик), 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 243-моддаси (жиноий фаолиятдан олинган даромадларни легаллаштириш) билан айбдор деб топилиб, унга нисбатан 1 йил 6 ой муддатга мансабдорлик ва моддий жавобгарлик вазифаларида ишлаш ҳуқуқидан маҳрум қилинган ҳолда 5 йил 2 ойга озодликдан маҳрум қилиш жазоси тайинланган. Шунингдек, ашёвий далил деб эътироф этилган Lacetti русумли автомашина ҳамда Андижон шаҳридаги икки қаватли бино давлат даромади ҳисобига ўтказилиши белгиланган.
Қўшимча қилинишича, жабрланувчилар Андижон вилоят судига апелляция шикояти ёзиб, судланувчи суд ҳукмида кўрсатилган жиноятни содир этмаганини айтиб, оқлов ҳукми чиқаришни сўраган. Андижон вилоят судининг Жиноят ишлари бўйича судлов ҳайъати томонидан аппеляция тартибида кўриб чиқилган ишда Жиноят ишлари бўйича Избоскан туман судининг 2021 йил 3-ноябдаги ҳукми ўзгартиришсиз қолдирилган.
Эслатиб ўтамиз, депутат дахлсизлик ҳуқуқидан маҳрум қилингач, «Дарё» мухбири вазиятга ойдинлик киритиш мақсадида журналистик суриштирув ўтказганди. Шуҳрат Каримов «Дарё» мухбирига берган интервьюсида депутат сифатида қонун ва қонуности ҳужжатлар ижросини халққа етказиш ва ижросини назорат қилишга ҳаракат қилгани, шу сабабли бир қатор ташкилотларга тегишли тартибда депутатлик сўровлари юборгани, бу эса мутасаддиларга ёқмаганини билдирганди.
Андижон шаҳар ҳокими Баҳром Ҳайдаров эса депутат Шуҳрат Каримов ўзига ажратилган тўрт гектар ер майдони атрофидаги қўшимча олти гектарни ҳам ноқонуний қўшиб олгани, ўзига бириктирилган ердан кўп қаватли уйлар, коттежлар, маиший хизмат бинолари қуриши керак бўлган бўлса-да, белгиланган ишлар амалга оширилмагани таъкидлаган.
Орадан бир ой ўтиб, дахлсизлик ҳуқуқидан маҳрум қилинган депутат Жиноят ишлари бўйича Избоскан тумани судининг 2021 йил 23 июндаги ажримига мувофиқ Жиноят кодексининг 168-моддаси (фирибгарлик) 3-қисми «б» банди ва бошқа моддалар билан гумон қилиниб, унга нисбатан қамоққа олиш эҳтиёт чораси қўлланилгани хабар қилинганди.
Изоҳ (0)