Россия Федерал хавфсизлик хизмати ходимлари Польша фуқароси — дипломатик мақомга эга халқаро ташкилот ходимасини қўлга олди, деб ёзади «Интерфакс». У Россияга алкоголь олиб кириш учун қалбаки ҳужжатларни расмийлаштириш эвазига 20 минг евро миқдорида пора олганликда гумонланмоқда.
Россия Ташқи ишлар вазирлиги қўлга олинган Малгожата Эва Бокшнайдерни «номақбул шахс» деб эълон қилди, унга мамлакатни тарк этиш учун бир ҳафта муҳлат берилди.
Идора Бокшнайдернинг Халқаро иқтисодий ҳамкорлик банки биноси ёнида қўлга олиниши акс этган видеони ҳам эълон қилди. Унда аёлнинг ҳужжатлари кўрсатилган бўлиб, уларга мувофиқ, у банкнинг стратегик режалаштириш бошқармасининг маркетинг бўлими бошлиғи бўлиб ишлайди.
ФХХ контрабанда сақланадиган омборхона топилганини маълум қилди. Шунингдек, Россияга ноқонуний равишда алкоголь олиб киришга алоқадорликда гумон қилиниб, уч нафар россиялик ҳам ушланган. Тинтув чоғида 2 миллион долларлик 40 тоннадан зиёд контрабанда алкоголь мусодара қилинган.
Польшага ракеталар келиб тушди
15 ноябрь куни Украина ҳудуди ёппасига ҳужумга учради, энергетика инфратузилмаси объектлари унинг нишонига айланди. Ҳукумат портлашлар ва электр энергиясидаги узилишлар ҳақида маълум қилди.
Шундан кейин Польшанинг Радио Зет радиоси Украина билан чегарадан 8 км узоқликда, Люблинск вилоятидаги Пшеводов қишлоғида жойлашган дон қуритиш иншоотида портлаш юз бериб, оқибатда икки киши ҳалок бўлганини маълум қилди. Ёнғин хизмати ҳодиса сабаби ҳозирча номаълумлигини қайд этди.
Associated Press америкалик мансабдорга таяниб, Польша ҳудудига ракеталар келиб тушганини маълум қилди. Польша ТИВ буни тасдиқлади.
Польшада миллий хавфсизлик қўмитаси фавқулодда йиғилиш ўтказди, шундан кейин Варшава баъзи ҳарбий қисмларда жанговар шайликни оширди. Польша президенти Анжей Дуда 16 ноябрга Миллий хавфсизлик кенгаши йиғилишини ҳам белгилаган.
Reuters ёзишича, шу куниёқ Польша илтимоси билан НАТО элчилари фавқулодда учрашув ўтказади, у альянс уставининг томонлардан бирининг ҳудудий яхлитлиги, сиёсий мустақиллиги ёки хавфсизлиги таҳдид остида қолган тақдирда, маслаҳатлашувлар олиб бориш ҳақидаги 4-моддаси асосида ташкил этилади. Шунингдек, 16 ноябрга БМТ Хавфсизлик кенгашининг Украинадаги вазият бўйича мажлиси ҳам белгиланган.
Россия портлашга алоқадорлигини рад этмоқда
Бир қатор мамлакатлар ҳодисада Россияни айблади. Россия Мудофаа вазирлиги портлашга алоқадорлигини рад этди ва Польша-Украина чегарасига яқин объектларга зарбалар берилмаганини маълум қилди. Мудофаа идораси бундай хабарларни «кескинликни кучайтиришга қаратилган провокация» деб атади. Пентагон Польшага келиб тушган ракеталар Россияники бўлганини ҳозирча тасдиқлай олмаслигини билдирди. ОАВларга кўра, воқеа жойидан топилган ракета бўлакларида ёзувлар йўқ.Дуда Варшавада ракеталарнинг келиб чиқиши ҳақида аниқ маълумотлар йўқлигини айтди. «Кун бўйи Россиянинг Украинага қарши ракета ҳужуми давом этганини аниқ биламиз, бироқ айни пайтда бизда бу ракетани ким учиргани юзасидан аниқ далиллар йўқ», — деди у.Бу орада Польша Ташқи ишлар вазирлиги Россия элчиси Сергей Андреевни чақиртирди ва ундан Украина ўққа тутилганидан кейин Польшанинг чегарага яқин қишлоғига «Россияда ишлаб чиқарилган снаряд келиб тушгани» юзасидан «зудлик билан батафсил тушунтиришлар» беришни талаб қилди.АҚШ президенти Жо Байден Балида дунё етакчилари билан учрашувда дастлабки маълумотлар Польшага ракеталар Россиядан учирилганини рад этаётганини маълум қилди.
Мавзуга доир:
Изоҳ (0)