Хонанда Селин Дионнинг овози улкан кема бортида содир бўлган гўзал, аммо фожиали севги ҳикоясига мос ва ҳамоҳангдир. Аммо аввалига тарихий ҳикояга эстрада қўшиғини киритиш ғояси яхши эмасдек туюлган.
Нега дастлаб “Титаник” режиссёри Жеймс Кемерон фильмга замонавий поп жанрида саундтрек ёзиш фикрига қарши бўлган, аммо охир-оқибат фикрини ўзгартирган? Sony Music компаниясининг собиқ раҳбари Томми Моттола тахминларига кўра, киностудия Кемеронга “қўшимча маркетинг воситаси” яратилиши учун босим ўтказган, чунки баъзилар лойиҳа муваффақиятсизликка учрашидан қўрққан.
Бироқ “Титаник”нинг ижрочи продюсери Жон Ландау бу фикрни рад этиб, Кемерон доим ҳар қандай жанрдаги қўшиқларни кўриб чиқишга тайёр бўлганини таъкидлаган, шунчаки у тарихий драмага поп йўналишидаги қўшиқ мос келишига шубҳа қилган.
“Титаник” саундтрекининг бастакори Жеймс Ҳорнер фильм продюсерларига маълум қилмаган ҳолда янги қўшиқ устида ишлай бошлайди. Қўшиқ матнини ёзиш учун у бошқа кинолойиҳаларда бирга ишлаган Уилл Женнингсни ёллайди. Ҳорнер Женнингсга асосий қаҳрамон “Титаник” ҳалокатидан омон қолган ва узоқ йиллар ўца ҳам, кемада топиб, йўқотган севгисини унутмайдиган Роуз ДеВитт Бюкейтер эканлигини айтиб беради.
Аммо Женнингс кичик ҳикояни тинглаш билан кифояланмайди. У Роуз қаҳрамонини Beatрис Вуднинг таржимайи ҳолидан илҳомланган ҳолда яратилганини билиб олади ва у билан учрашишга қарор қилади (Beatрис Вуд “Титаник” йўловчиси бўлмаган, аммо Роуз сингари санъатга иштиёқи баланд ва мазмунли ҳаёт кечирган оқила аёл бўлган). Вуд ўшанда 103 ёшда эди.
“У менинг қўлимни силкиганида, кўнглимда яшашга иштиёқ туйғуси пайдо бўлди. Бу ҳаётимда аввал ҳис этган ва бошимдан кечирган ҳеч қайси бир ҳолатга ўхшамас эди”, деб эслайди Женнингс.
Бастакор ушбу учрашувдан илҳомланиб, “My heart will go on” номли абадий севги ҳақида қўшиқ ёзади. Мусиқа ва матн тайёр бўлгач, Ҳорнер ва Женнингс қўшиқни қайси хонанда куйлаши ҳақида ўйлай бошлади.
Иккаласи ҳам 1991 йилда “Америка ҳикояси 2: Фивел Ғарбга йўл олади” анимацион фильмининг саундтреки учун тингловда иштирок этган Селин Дионни танлайди. Гарчи “Dreams to dream” қўшиғи охир-оқибат Линда Ронстадт томонидан ижро этилган бўлса-да, Канадалик хонанда уларнинг ёдида қолган эди. Бундан ташқари, Дион бир нечта йирик ҳит қўшиқларни, жумладан, 1991 йилда Disney’нинг “Соҳибжамол ва Маҳлуқ” фильмига саундтрекни ижро этган эди.
Ҳорнер биринчи марта Лас Вегасдаги меҳмонхонада Селин Дионга қўшиқни пианинода чалиб беради, аммо куй хонандада яхши таассурот қолдирмайди. Шунингдек, Селин яна бир бор саундтрек айтиш нияти йўқ эди. Ҳорнер пианинода куйни чалаётган пайтда хонанда ўзининг турмуш ўртоғи Рене Анжелилга қарата: “Мен бу қўшиқни куйламайман” дейди.
Аммо Анжелил куйни эшитар экан, асар рафиқаси учун жуда мос эканини тушунади ва Ҳорнерга Селин демо версиясини ёзишга розилигини айтади. Бундан Дионнинг жаҳли чиқади, аммо эрининг айтганига рози бўлади. Орадан бир неча ҳафта ўтгач, улар Нью Йоркдаги студияга учиб келади.
Ҳорнер Дионга “Титаник” сюжети ҳақида қисқача айтиб беради ва хонанда вокал кабинасига киради. Эшитган севги ҳикояси қаттиқ таъсир қилган Селин қўшиқни бир уринишда тўлиқ ижро этиб беради.
“Ҳамма йиғлай бошлади, мен ҳам эшитган ҳикоямдан таъсирланиб, кўзларимга ёш олдим“, деган эди хонанда интервьюлардан бирида.
Жеймс Кемерон охир-оқибат мазкур қўшиқнинг саундтрек бўлишига рози бўлди ва фильмни “My heart will go on” куйи билан бирга қўйиб берганда Селин Дион узоқ вақт йиғлаб олди.
Изоҳ (0)