Бугунги кунда кўплаб ота-оналар фарзандларини доимий равишда турли машғулотлар, ўйинлар ва мультфильмлар билан банд қилишга интилади. Аммо психологлар таъкидлашича, бола учун баъзан ҳеч нарса қилмасдан, оддийгина зерикиб ўтириш ҳам фойдали. Бу унинг тасаввури, ижодкорлиги ва мустақил фикрлаш қобилиятини ривожлантиради.
Россиялик психолог Галина Губанова буни шундай изоҳлайди:
“Замонавий оилаларда ота-оналар болаларни жуда эркалатишади, натижада улар ҳеч қачон зерикмайди ва ўз тасаввурини ишга солишга мажбур бўлмайди. Аслида эса бу келажакдаги, жумладан, интеллектуал ривожланишдаги жуда муҳим жараён ҳисобланади”.
Зерикишнинг фойдаси
Тадқиқотлар шуни кўрсатадики, ортиқча ташқи стимуллар — ранг-баранг ўйинчоқлар, кўплаб тўгараклар ва мультфильмлар боланинг диққатини чалғитади. У кўп нарсани билиши мумкин, аммо қарор қабул қилишда қийналади, бошлаган ишини охирига етказа олмайди.
Британиялик психолог Сюзен Макдоналднинг фикрича, зерикиш боланинг мияси учун бўш саҳифа вазифасини бажаради ва бола айнан шу саҳифани ўзи хоҳлаганча тўлдиради. Бу жараёнда бола муаммоларни мустақил ҳал қилиш, ижодий фикрлаш ва ўзини ўзи рағбатлантириш кўникмаларини ривожлантиради.
Ота-оналарга амалий тавсиялар
Экран вақтини чекланг. Смартфон ва телевизорни ортиқча ишлатиш болани тайёр контентга ўрганиб қолишига олиб келади;
Оддий ўйинчоқлар беринг. Картон қути, кублар, қоғоз ва ручка каби воситалар тасаввурни кучайтиради;
Мустақил ўйнаш учун шароит яратинг. Ҳар дақиқа бола билан шуғулланиш шарт эмас — унга ўзи топган ўйинларни ўйнашга имкон беринг;
Очиқ ҳавода вақт ўтказинг. Табиат қўйнида болалар мустақил равишда янги қизиқишлар ва ўйин қоидаларини ярата олади.
Изоҳ (0)