Сардор Милано «Голос» лойиҳаси финалига чиқди

23 декабрь, жума куни Россиянинг Биринчи каналида «Голос» лойиҳаси бешинчи мавсумининг ярим финал босқичи бўлиб ўтди ва финалчилар аниқланди.

Ушбу лойиҳада Полина Гагарина жамоасида иштирок этаётган ўзбекистонлик Сардор Милано Сара Брайтманнинг Il Mio Cuore Va қўшиғини ижро этди.

Бу қўшиқ Селин Дионнинг My Heart Will Go On таронасининг итальянча варианти ҳисобланади. Селин Дион ижросидаги қўшиқнинг оригинали Жеймс Кэмероннинг «Титаник» фильмининг асосий саундтреки ҳисобланади. Бу қўшиқ «Оскар», «Олтин глобус» ва тўртта «Грэмми» билан тақдирланган.

Сардорнинг рақиби Михаил Житов «Бабушка» қўшиғини ижро этди.

Полина Гагарина ўз овозининг 60 фоизини Сардорга, 40 фоизини Михаилга беришга қарор қилди. Махсус рақамга SMS юборган ва қўнғироқ қилган телетомашабинларнинг ҳам ярмидан ортиғи ўзбекистонлик хонандага овоз берди ва Сардор «Голос»нинг финалига чиқди.

«Голос» финали 30 декабрь куни бўлиб ўтади. Унда Сардор Миланога Дима Билан жамоасидан қирғизистонлик Қайрат Примбердиев, Леонид Агутин жамоасидан Дарья Антонюк ва Григорий Лепс жамоасидан Александр Панайотов рақиблик қилади.

Эслатиб ўтамиз, Сардор биринчи босқичдан сўнг ўзига Дима Биланни устозликка танлаганди. Аммо «баттл»да Дима Билан ўз жамоасида уни қолдиришни истамади ва Миланони Полина Гагарина ўз жамоасига олди.

Сардор 2015 йилда Россиядаги бошқа бир лойиҳа — «Главная сцена»да қатнашиб, унда ғолибликни қўлга киритган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.