Xonanda Selin Dionning ovozi ulkan kema bortida sodir bo‘lgan go‘zal, ammo fojiali sevgi hikoyasiga mos va hamohangdir. Ammo avvaliga tarixiy hikoyaga estrada qo‘shig‘ini kiritish g‘oyasi yaxshi emasdek tuyulgan.
Nega dastlab “Titanik” rejissyori Jeyms Kemeron filmga zamonaviy pop janrida saundtrek yozish fikriga qarshi bo‘lgan, ammo oxir-oqibat fikrini o‘zgartirgan? Sony Music kompaniyasining sobiq rahbari Tommi Mottola taxminlariga ko‘ra, kinostudiya Kemeronga “qo‘shimcha marketing vositasi” yaratilishi uchun bosim o‘tkazgan, chunki ba’zilar loyiha muvaffaqiyatsizlikka uchrashidan qo‘rqqan.
Biroq “Titanik”ning ijrochi prodyuseri Jon Landau bu fikrni rad etib, Kemeron doim har qanday janrdagi qo‘shiqlarni ko‘rib chiqishga tayyor bo‘lganini ta’kidlagan, shunchaki u tarixiy dramaga pop yo‘nalishidagi qo‘shiq mos kelishiga shubha qilgan.
“Titanik” saundtrekining bastakori Jeyms Horner film prodyuserlariga ma’lum qilmagan holda yangi qo‘shiq ustida ishlay boshlaydi. Qo‘shiq matnini yozish uchun u boshqa kinoloyihalarda birga ishlagan Uill Jenningsni yollaydi. Horner Jenningsga asosiy qahramon “Titanik” halokatidan omon qolgan va uzoq yillar o‘tsa ham, kemada topib, yo‘qotgan sevgisini unutmaydigan Rouz DeVitt Byukeyter ekanligini aytib beradi.
Ammo Jennings kichik hikoyani tinglash bilan kifoyalanmaydi. U Rouz qahramonini Beatris Vudning tarjimayi holidan ilhomlangan holda yaratilganini bilib oladi va u bilan uchrashishga qaror qiladi (Beatris Vud “Titanik” yo‘lovchisi bo‘lmagan, ammo Rouz singari san’atga ishtiyoqi baland va mazmunli hayot kechirgan oqila ayol bo‘lgan). Vud o‘shanda 103 yoshda edi.
“U mening qo‘limni silkiganida, ko‘nglimda yashashga ishtiyoq tuyg‘usi paydo bo‘ldi. Bu hayotimda avval his etgan va boshimdan kechirgan hech qaysi bir holatga o‘xshamas edi”, deb eslaydi Jennings.
Bastakor ushbu uchrashuvdan ilhomlanib, “My heart will go on” nomli abadiy sevgi haqida qo‘shiq yozadi. Musiqa va matn tayyor bo‘lgach, Horner va Jennings qo‘shiqni qaysi xonanda kuylashi haqida o‘ylay boshladi.
Ikkalasi ham 1991-yilda “Amerika hikoyasi 2: Fivel G‘arbga yo‘l oladi” animatsion filmining saundtreki uchun tinglovda ishtirok etgan Selin Dionni tanlaydi. Garchi “Dreams to Dream” qo‘shig‘i oxir-oqibat Linda Ronstadt tomonidan ijro etilgan bo‘lsa-da, Kanadalik xonanda ularning yodida qolgan edi. Bundan tashqari, Dion bir nechta yirik hit qo‘shiqlarni, jumladan, 1991-yilda Disney’ning “Sohibjamol va Mahluq” filmiga saundtrekni ijro etgan edi.
Horner birinchi marta Las Vegasdagi mehmonxonada Selin Dionga qo‘shiqni pianinoda chalib beradi, ammo kuy xonandada yaxshi taassurot qoldirmaydi. Shuningdek, Selin yana bir bor saundtrek aytish niyati yo‘q edi. Horner pianinoda kuyni chalayotgan paytda xonanda o‘zining turmush o‘rtog‘i Rene Anjelilga qarata: “Men bu qo‘shiqni kuylamayman” deydi.
Ammo Anjelil kuyni eshitar ekan, asar rafiqasi uchun juda mos ekanini tushunadi va Hornerga Selin demo versiyasini yozishga roziligini aytadi. Bundan Dionning jahli chiqadi, ammo erining aytganiga rozi bo‘ladi. Oradan bir necha hafta o‘tgach, ular Nyu Yorkdagi studiyaga uchib keladi.
Horner Dionga “Titanik” syujeti haqida qisqacha aytib beradi va xonanda vokal kabinasiga kiradi. Eshitgan sevgi hikoyasi qattiq ta’sir qilgan Selin qo‘shiqni bir urinishda to‘liq ijro etib beradi.
“Hamma yig‘lay boshladi, men ham eshitgan hikoyamdan ta’sirlanib, ko‘zlarimga yosh oldim“, degan edi xonanda intervyulardan birida.
Jeyms Kemeron oxir-oqibat mazkur qo‘shiqning saundtrek bo‘lishiga rozi bo‘ldi va filmni “My heart will go on” kuyi bilan birga qo‘yib berganda Selin Dion uzoq vaqt yig‘lab oldi.
Izoh (0)