2022 йилда машҳур қўшиқчи Селин Дионда мушаклар қотиши синдроми аниқланди. Шу сабабли хонанда концерт дастурлари ва гастролларни бекор қилишга мажбур бўлди.
Кам учрайдиган ва тиббиётда ҳозирча давоси топилмаган мушаклар қотиши синдромидан азият чекаётган канадалик қўшиқчи ўзининг касаллиги тафсилотлари ҳақида сўзлаб берди.
Селин Дион шу йилнинг ноябрь ойида Кети Перрининг концертида қатнашиб, мухлисларга тез орада саҳнага қайтишига умид берган эди. Бироқ унинг касаллиги доимий оғриқлар ва ноқулайлик туғдиргани учун кундалик ҳаётида оғир кунлар бошланган. Хусусан, Селин қизилўнгач, ошқозон, умуртқа поғонаси ва қовурғаларида спазмларни ҳис қилади. Бундан ташқари, Селинда бир марта кучли титроқ ва талвасалар бўлиб ўтганда унинг қовурғалари синиб кетган.
“Доим мени кимдир бўғаётганга ўхшайди, ҳалқумимда кучли босим ва оғриқни ҳис қиламан. Қорин, умуртқа поғонаси ёки қовурғаларимда ҳам спазмлар бўлиб туради. Агар оёқларимни буксам, улар ўша ҳолда қотиб қолади ва мушакларимни қайта ўз ҳолига келтира олмайман. Ҳатто шунчаки таом пишираётган пайтимда бармоқларим ва қўлларим маълум ҳолатда қотиб қолади”, — деди Селин Дион Today нашрига берган интервьюсида.
Унинг қўшимча қилишича, Селиннинг ташхиси тиббиётда ҳали тўлиқ ўрганилмаган ва ҳозиргача хонандага ёрдам берадиган дори топилмаган. Лекин қўшиқчининг қариндошлари умидини йўқотмаганини, Дионнинг ўзи эса саҳнага қайтишни орзу қилишини айтди.
Изоҳ (0)