PSY — Gangnam Style, 2012 йил
2012 йил 24 ноябрда жанубий кореялик хонанда PSY (ёки Пак Че Сан) бой ва машҳур бўлиб уйғонди: унинг Gangnam Style қўшиғига ишланган клипи YouTube тарихидаги энг кўп кўрилган видеога айланди. Хит ҳар ҳафта тобора оммалашиб борди ва 2014 йилда уни 2 миллиарддан ортиқ одам томоша қилди, шу сабабли Google яратувчилари сайтдаги ҳисоблагич кодини кўтаришга мажбур бўлишди. Бундай рақамлар билан қўшиқчи Гиннеснинг рекордлар китобига, шу жумладан, «Интернетда биринчи 24 соат ичида энг кўп кўрилган видео» номинациясига эга бўлди.
Аммо энг қизиғи шундаки, Gangnam Style Пак Че Сан фаолиятидаги ягона муваффақиятли хит бўлиб қолди. Ундан сўнг у яна 7 та композиция чиқарди, аммо улардан кўп даромад ололмади.
Готе ва Кимбра — Somebody That I Used to Know, 2011 йил
Австралиялик қўшиқчи Готе (ёки Воутер де Баккер) 2011 йил июль ойи бошида бутун дунё эътиборини тортди. У Янги Зеландия юлдузи Кимбра билан бирга ижро этган Somebody That I Used to Know қўшиғига ишланган клип дарҳол интернетда машҳур бўлди. Бир йил ўтгач, композиция барча мусиқий жадвалларда етакчиликни давом эттирди ва Billboard журнали уни 1-рақамли хит деб номлади. Шу билан бирга, Готенинг ўзи ҳам энг истеъдодли ва юқори ҳақ тўланадиган мусиқачилардан бири деб атала бошлади.
Бироқ қўшиқчи Somebody That I Used to Know муваффақиятини такрорлай олмади. Кейинги беш йил давомида ҳеч ким Готени эсламади ҳам. Айтишларича, қўшиқчи карьерасида танаффус қилишга қарор қилган.
Las Ketchup — The Ketchup Song, 2002 йил
2002 йилда Las Ketchup квартетидаги испан опа-сингиллар бутун дунёга машҳур бўлди. Улар Асереже хитини, сўнгра унинг инглизча версияси — The Ketchup Song қўшиғини тақдим этишди. Қизиқарли қўшиқнинг мотиви ва қизларнинг ўша пайтдаги рақслари замонавий эстрададан узоқ одамларга ҳам таниш эди.
Шон-шуҳрат тўлқинида гуруҳ Hijas Del Tomate альбомини чиқарди ва кейин ... аста-секин сўна бошлади. 2006 йилда Las Ketchup’нинг иккинчи диски чиқди, бир мунча вақт ўтгач эса гуруҳнинг тарқалиши маълум бўлди. Вокалчилар ҳозир нима қилаётгани маълум эмас. Аммо улар ўзлари учун идеал яшаш шароитларини яратишга муваффақ бўлганлари аниқ.
Селин Дион — My Heart Will Go On, 1997 йил
Селин Дион мусиқий карьерасини 80 йилларнинг бошларида бошлаган, аммо 1997 йилда Голливуднинг энг бой юлдузларидан бирига айланди. Ҳаммаси «Титаник» фильмининг саундтреки My Heart Will Go On қўшиғини ижро этиши туфайли. Бу қўшиқ ҳозиргача хонанданинг ўзига хос ташриф қоғози бўлиб, уни деярли барча таниқли санъаткорлар куйлаб кўрган. Аммо тан олиш керакки, Селин томонидан ижро этилган хит ҳали ҳам энг аълоси бўлиб қолмоқда.
Ҳозирда Дионнинг 20 дан ортиқ альбоми бор. У ҳали ҳам гастролларда ва мухлисларни хурсанд қилиш билан банд: 2018 йил май ойида юлдуз «Дедпул-2» фильми учун Ashes саундтрекини ижро этди.
Los del Rio — Macarena, 1993 йил
Испаниянинг Los del Rio гуруҳи 1992 йилда машҳур Macarena қўшиғини ва у учун махсус яратилган рақсни тақдим этди. 1996 йилда қўшиқ Америкада хит даражасига кўтарилди ва Los del Rio пластинкасини 4 миллиондан ортиқ одам сотиб олди.
Аммо, афсуски, Los del Rio йигитлари шундан кейин бу каби хит чиқара олмади. Ҳатто уларнинг Macarena Christmas ва Baila Baila қўшиқлари ҳам катта омад олиб келмади.
Kaoma — Ламбада, 1989 йил
Франциянинг Kaoma гуруҳи мусиқачилари биринчи қўшиғи чиқиши биланоқ бой ва машҳур бўлиб кетди. Бу хит тарихга кирди ва асрнинг энг машҳур қўшиқларидан бирига айланди. Бундай натижага 80 йилларнинг охирида интернетга клип юклаш орқали 24 соат ичида бойиб кетишнинг иложи бўлмаган вақтда эришилди. Бундан келиб чиқадики, санъаткорлар ҳашаматли уйлар ва машиналарни фақат бутун дунё бўйлаб гастрол сафарларида топган пулларига сотиб олишган, деб тахмин қилиш мумкин.
Мавзуга доир:
Изоҳ (0)