Қамоқхонада туғилган, 200 долларга баҳоланган ва шкафда ухлаган: Машҳурликка қийинчилик ва оғир меҳнат эвазига эришган актёр ва актрисалар (фото)

Голливуд юлдузларининг гонорари ўн миллионлаб долларларни ташкил қилади. Улар машҳурликка эришгач, ҳаётнинг барча афзалликларидан баҳраманд бўлади. Аммо муваффақиятга эришиш йўли ҳар доим ҳам осон эмас. Кўпинча у оғир синовлар ва тўсиқлар билан бирга келади.

Крис Прэтт

Актёр Крис Прэттнинг оиласи отасининг иши туфайли доимий равишда штатдан штатга кўчиб юрган. Кўп йиллар сарсон-саргардон бўлгандан сўнг улар Сиэтлнинг бир чеккасида истиқомат қилган. Бироқ оила бошлиғига хавфли склероз ташхиси қўйилгандан кейин барча ташвишлар онанинг елкасига тушган. Супермаркетдаги кичик маош ҳеч нарсага етмас, камига орадан кўп ўтмай оила бошпанасини ҳам йўқотган.

Крис мактабда ўқишни тугатиши учун оила вақтинча квартирани ижарага олган. Ўрта мактабни тугатгач, Прэтт коллежга борди, лекин тез орада ўқишни ташлаб кетди. Бир муддат уйма-уй юриб, чегирмага купон сотди ва омад кулиб боққунча официант бўлиб ишлади.

Скарлетт Йоханссон

Скарлетт Йоханссон доимий равишда ўн миллион доллар гонорар олувчи Голливуд юлдузлари қаторига киради. Бироқ актрисанинг болалик осмонида ҳам қора булутлар сузган. Йоханссон Нью-Йоркнинг энг нуфузли ва қиммат ҳудуди бўлган Манхэттенда туғилиб ўсган бўлишига қарамай, бўлажак актрисанинг ота-онаси аранг кун кечирарди.

Интервьюларнинг бирида Йоханссон улар нафақа асосида яшаганини маълум қилган. Оилада тўрт нафар болани боқиш учун ота-она камбағал оилаларга мўлжалланган купондан фойдаланган.

Лейтон Мистер

Лейтон Мистер «Ғийбатчи қиз» телесериалидаги манхеттенлик бой мактаб ўқувчиси – Блер Уольдорф роли билан дунёга танилди. Лейтон муваффақиятга эришиши учун жуда кўп қийинчиликларни бошдан кечирган. Актрисанинг қамоқхонада туғилгани кўпчиликка номаълум. У ҳаётининг дастлабки ойларини токи бувисининг қарамоғига келгунига қадар маҳкумлар учун реабилитация марказида ўтказган.

Вуди Харрельсон

Актёр 12 ёшга тўлганида, отаси қамоққа тушган, у ерда 5 йил бўлган ва бир неча йил ўтгач, яна судланиб, умрининг қолган қисмини қамоқда ўтказган. Оилани боқиш юки эса бутунлай онанинг елкасига тушган. Шунинг учун Вуди ёшлигиданоқ меҳнат қилишга мажбур бўлган.

У 9 ёшидаёқ пул топиш йўлини ўйлаб топди. Бўлажак актёр газеталарни нашриётдан кўтарасига (оптом) сотиб олиб, хонадонларга етказиб берарди. Аммо бу бизнес тезда касодга учради. «Муаммо мен газеталарни етказиб беришда яхши, лекин мижозлардан пул йиғишни уддалай олмаганимда эди», – дейди актёр.

Селин Дион

Селин Дион катта оилада ўсган, қўшиқчи 14 фарзанднинг энг кичиги эди. Табиийки, оила кўпинча молиявий қийинчиликларга дуч келарди. Масалан, хонанда шкафнинг тортмасида ухлашига тўғри келарди, чунки уйда ҳамма учун ҳам каравот етарли бўлмаган.

Жим Керри

Отаси ишдан айрилганида Жим Керри ҳали ёш эди. Уй сотиб ололмаган оила бир лагердан иккинчисига кўчиб, чодирларда ухлашга ҳам мажбур бўлган. Жим етишмовчилик туфайли ўсмирлик чоғидаёқ ота-онасининг ишига ёрдам берар, фаррош ва қўриқчи бўлиб ишлар эди.

Мила Кунис

Мила Кунис украиналик муҳожирлар оиласида ўсган. Қиз 7 ёшга кирганида улар оилавий АҚШга кўчиб кетган. Актрисанинг ота-онаси том маънода ҳаётни нолдан бошлаши керак эди. Куниснинг айтишича, уларнинг молиявий аҳволи шунчалик ачинарли эдики, баъзида оила кечки овқатга кетчупдан тайёрланган шўрва ичарди.

Жастин Бибер

Миллионлаб мухлисларнинг кумири ҳам болалигида моддий қийинчиликка учраган оилада ўсган: уни онаси тарбиялаган. Улар сичқонлар билан тўла уйда яшаган ва ҳамма жойда сичқончанинг қопқонлари бўлган. «Менинг ҳақиқий каравотим бўлмаган. Хонамда кўк рангли йиғиладиган диванда ухлардим. Музлатгичда ҳам ҳеч нарса бўлмаган, фақат мактаб тушлиги, макарон ва пишлоқдан ташқари», деб эслайди хонанда.

Кейт Уинслет

Кейт Уинслетнинг ота-онаси актёр. «Титаник» юлдузининг болалиги ҳам қийинчиликда ўтган. Оилани боқиш учун актрисанинг отаси почтачи бўлиб ишлаган ва ҳатто асфальт ҳам ётқизган. Уинслет биринчи видеомагнитофонни фақат унинг 12 ёшида олинганини эслайди.

Билли Боб Торнтон

Билли Боб Торнтон Арканзас штатидаги катта оилада ўсган. Улар оиласи камбағал бўлиб, озиқ-овқат етишмас эди. Актёр ёшлигидан оиласига ёрдам бериш учун ишлаган. Мактабда ўқиш билан бир қаторда у фабрикада ишлаган ва маҳаллий гуруҳлар билан бирга чиқиш қилган.

Деми Мур

Деми Мурнинг ота-онаси унинг туғилмасидан олдин ажрашган. Бўлажак актриса 3 ойлик бўлганида онаси бошқа эркакка турмушга чиққан. Уйдаги муҳит ниҳоятда ёмон эди. Оила доимий равишда бир шаҳардан бошқасига кўчиб ўтиб, охир-оқибат Лос-Анжелесга жойлашган, у ерда Мурнинг моделлик, кейин эса кино карьераси бошланди.

Жеки Чан

Жеки Чан Гонконгда хитойлик қочқинлар оиласида туғилган. Унинг ҳаёти алоҳида фильм бўлишга арзийди. Актёрнинг онаси шошилинч равишда кесарча кесиш орқали болани дунёга келтириши керак бўлган. Аммо операция нархи оила учун жуда қимматлик қилган ва ёш ота-она ҳатто болани британиялик шифокорга 200 долларга сотиш ҳақида ўйлаб кўрган.

Яхшиямки, қариндошлар уларни бу қарордан қайтарган. Эр-хотин Франция элчихонасига ишга киргач, оиланинг моддий аҳволи бироз яхшиланган. Бўлажак актёрнинг онаси хизматкор, отаси эса ошпаз бўлиб ишлаган. Пул танқислигидан улар аранг ҳаёт кечирган. Кейинчалик унинг ота-онаси Жекини Пекин опера мактаб-интернатига юборган, у ерда 10 йил давомида Жеки акробатика, қўшиқ куйлаш, жанг санъати ва пантомима билан шуғулланган.

Бўлажак актёр мактабда келажакдаги карьерасига ёрдам берадиган кўникмаларни ўрганган бўлса-да, у ерда ўтказган йиллар жуда оғир кечган, шунинг учун у ҳанузгача ўша вақтларни эслашни хоҳламайди.