Станиславскийнинг саҳна санъати назарияси одатда актёрлар, яъни кадр ташқарисида эмас, ичида бўлганлар билан боғланади. Голливудда ҳам кўплаб режиссёрлар борки, улар актёрлар ижросида самимийлик ва ҳиссий иштирокини ошириш учун Станиславский системасидан фойдаланишади. Айрим режиссёрлар мукаммалликка эришиш учун ҳар қандай чегарани кесиб ўтишга тайёр бўлади, натижада актёрлар ҳақиқий азобларни бошдан кечиради. Бундай режиссёрлардан бири Стенли Кубрик ва Альфред Ҳитчкок эди. Замонавий кинода бундай экстремал усуллар кам учраса-да, баъзи истиснолар ҳам бўлиб туради — бугун ана шу ҳақида гаплашамиз.
“Биллни ўлдириш”, 2003
- жангари, драма, триллер / АҚШ
- Режиссёр: Квентин Тарантино
- Ролларда: Ума Турман, Люси Лю, Вивика А. Фокс, Жули Дрейфус
Квентин Тарантино ва унинг илҳом париси Ума Турман ўртасидаги дўстлик барчага абадийдек туюлган эди, аммо 2010 йилларнинг ўрталарида актриса “Биллни ўлдириш” фильмини суратга олиш майдончасида юз берган нохуш ҳодиса ҳақида очиқ гапириб чиқади. Маълум бўлишича, кабриолетда олинган машҳур саҳна давомида Турман жиддий автоҳалокатга учраган — у соатига 65 км тезликда ҳаракатланаётиб, бошқарувни йўқотган ва дарахтга урилган. Машина бутунлай яроқсиз ҳолга келган, Турманнинг ўзи эса оғир тан жароҳатлари, мия чайқалиши, бўйин ва оёқ синиши билан шифохонага ётқизилган. Эътиборли томони шундаки, аввалига у ушбу саҳнада суратга тушишни хоҳламаган ва каскадёрдан фойдаланишни талаб қилган. Бироқ Тарантино ва фильм продюсери Ҳарви Вайнштейн Турманнинг ўзи кадрда бўлишини талаб қилган.
“Омон қолган”, 2015
- жангари, вестерн, драма / АҚШ
- Режиссёр: Алехандро Гонсалес Инярриту
- Ролларда: Леонардо Ди Каприо, Том Ҳарди, Донал Глисон
Леонардо Ди Каприонинг илк “Оскар” мукофоти унга жуда қимматга тушган. Алехандро Инярриту режиссёрлигидаги “Омон қолган” фильмининг узоқ давом этган суратга олиш ишлари Канада ўрмонларида бўлиб, актёрлар ҳақиқий синовлардан ўтади. Режиссёр фильми иложи борича реал чиқиши мақсадида Ди Каприони муздек сувга тушишга, хом бизон гўштини ейишга ва от жасади ичида ухлашга мажбур қилади. Тҳе Hollywood Reporter маълумотига кўра, бу жараён ҳақиқий “дўзах”га айланган, хавфсизлик чораларига эътибор берилмаган, об-ҳаво шароити эса ишларга тўсқинлик қилган.
“Титаник”, 1997
- драма, мелодрама / АҚШ
- Режиссёр: Жеймс Кемерон
- Ролларда: Леонардо Ди Каприо, Кейт Уинслет, Билли Зейн
“Аватар” ва “Титаник” фильмлари режиссёри Жеймс Кемерон ўз ишига садоқати ва қаттиққўллиги билан машҳур. Унга нафақат суратга олиш гуруҳи, балки продюсерлар ҳам мослашишга мажбур бўлган. Сўнгги йилларда Кемерон анча юмшаган бўлса-да, 90 йилларда характерини тўлиқ намоён қилган, бу эса “Титаник” фильмини суратга олишда кўплаб можароларга сабаб бўлган. Энг катта муаммо актриса Кейт Уинслет билан содир бўлган. Кемероннинг ўзи ҳам Уинслетнинг соғлиғига бефарқ бўлганини тан олган, актрисани совуқ сувда узоқ вақт қолишга мажбурлаган.
“Чайнатаун”, 1974
- детектив, драма, триллер / АҚШ
- Режиссёр: Роман Полански
- Ролларда: Жек Николсон, Фей Данауэй, Жон Ҳьюстон
Роман Полански энг жанжалкаш режиссёрлардан бири сифатида танилган бўлиб, унинг номи бир қатор даҳшатли воқеалар билан боғлиқ. Буларга ҳомиладор Шерон Тейт ва унинг дўстларининг ўлдирилиши, шунингдек, 1970 йилларда Жек Николсоннинг уйида вояга етмаган қизни зўрлаш киради. Поланскининг актёрлар билан ишлашдаги ижодий усуллари унинг ахлоқий қадриятларини шубҳа остига қўяди. “Чайнатаун” фильмини суратга олишда бош рол ижрочиси Фей Данауэй доимий тазйиқларга дуч келган. Унинг қаҳрамони Эвелин Кросс-Мулрай оғир руҳий ҳолатда бўлгани учун Полански бу ҳиссиётларни кучайтириш мақсадида Данауэйни дубллар оралиғида қўрқитган. Актриса “Оскар” номинациясига сазовор бўлишига қарамай, Полански билан ишлаш тажрибасидан ёмон таассуротлар билан қолган. Ўз мемуарларида у “Полански заиф аёлларни ёқтирарди, улар унга таҳдид солмасди”, деб эслайди. Данауэй эса ҳеч қачон бундай аёл бўлмаган.
Изоҳ (0)