АҚШнинг Техас штати, Остин шаҳридаги Target дўкони автотураргоҳида 11 август куни отишма содир бўлди. Полиция 30 ёшлар атрофидаги руҳий муаммолари бўлган Блейн Нинекер исмли эркак 3 кишини отиб ўлдирганини маълум қилди. Бу ҳақда Newsweek хабар берди.
Маълум қилинишича, гумондор ҳужумдан сўнг аввал бир машинани ўғирлаган. Унда автоҳалокатга учрагач, эркак дилерлик марказидан яна бир бошқа машинани олиб қочган. Шундан сўнг, тахминан 32 километр нарида полиция уни электрошокер ёрдамида қўлга олган.
Икки киши воқеа жойида, яна бири эса шифохонада вафот этган. Полиция ҳозирда ҳодиса тафсилотларини ўрганмоқда ва гувоҳлардан видеоёзувларни тақдим этишни сўрамоқда. Остин полицияси бошлиғи Лиза Дэвис воқеа содир бўлган куни журналистларга шундай интервью берган:
“Биз адолатни таъминлаш мақсадида жабрланганлар керакли ёрдамни олишларини таъминлаймиз. Бу Остин учун жуда қайғули кун бўлди. Ҳаммамиз учун ҳам жуда қайғули кун. Уларнинг оила аъзоларига ҳамдардлик билдираман”.
Маълумотларга кўра, гумондор Блейн Нинекер 2011 йилдан бери руҳий касалликдан азият чекиб келади. У шу пайтгача бир неча бор жиноий жавобгарликка тортилган, хусусан, ўз оила аъзосини калтаклаган, маст ҳолда икки марта машина ҳайдаган ва мулкка зарар етказган.
Изоҳ (0)