2017 йилда Нью-Йоркда теракт содир этган Ўзбекистон фуқароси Сайфулло Сойипов иши бўйича суд мажлисида ҳакамлар ҳайъати қатл ҳукми учун зарур бўлган якдил қарорга кела олмади. Шунинг учун судланувчи узоқ муддатга озодликдан маҳрум қилинади.
2023 йилнинг январь ойи бошида ҳакамлар ҳайъати Сойиповни 28 та айблов, жумладан, қотиллик, қотилликка уриниш ва хорижий террорчилик гуруҳини қўллаб-қувватлашда айбдор деб топди, аммо Нью-Йоркдаги қонунларга кўра у ўлимга ҳукм этилиши учун жюрининг барча 12 аъзоси бунга қўшилиши талаб этилади — умумий келишувга эришилмади. Нью-Йорк штатида олий жазо 1953 йилдан бери қўлланмаган.
Қонунга мувофиқ ўлим жазоси узоқ муддатли қамоқ жазосига алмаштирилади. Судья шундай ҳукмни чиқаришга мажбур ва уни алмаштира олмайди. Ҳукмнинг якуний қисми кейинроқ эълон қилинади.
Прокурорлар аввалроқ гумондорни қатл этишга лойиқ деб ҳисоблаган турли омилларни келтирган эди. Сойиповнинг ҳужуми олдиндан ва пухта режалангани, террорчи ташкилотни қўллаб-қувватлаш мақсадида амалга оширилгани шулар жумласидандир.
Сойипов ва унинг жинояти ҳақида
Сайфулла Сойипов 1988 йил 8 февралда Тошкент шаҳрида туғилган. 2005 йилда касб-ҳунар коллежини тамомлаган, 2005−2009 йилларда Тошкент молия институтида таълим олган. ОТМни тамомлаганидан сўнг пойтахтдаги “Саёҳат” меҳмонхонасида ҳисобчи бўлиб ишлаган.
У Қўшма Штатларга 2010 йилда грин-карта орқали борган. 2017 йил 31 октябрида у кичик юк машинасини ижарага олади ва велосипедлар ҳаракатланадиган йўлакка бостириб киради. Унинг қурбонига айланган саккиз киши орасида Аргентинадан келган беш киши ва бир нафар Бельгия фуқароси бўлган, яна 12 киши тан жароҳати олган. Сойиповни унинг қорнига ўқ узган полициячи тўхтатади.
Сойипов ИШИД номидан ҳаракатланганини тан олган ва ўзини ушбу гуруҳ “аскари” деб атаган. (У АҚШга кетгунига қадар жиноий жавобгарликка тортилмаган ва ҳуқуқни муҳофаза қилиш органлари эътиборига тушмаган).
Сайфулло Сойипов умрининг қолган қисмини Колорадо штатидаги максимал даражада қатъий режимдаги АDХ Florence федерал қамоқхонасида ўтказади. 2013 йил апрелида Бостон марафонида портлашлар уюштиришда айбланиб, ўлимга ҳукм қилинган Жоҳар Сарнаев ҳам шу қамоқхонада сақланмоқда.
Изоҳ (0)