Apple компанияси АҚШдаги инвестицияларини яна 100 миллиард долларга оширишини эълон қилди. Бунга Дональд Трампнинг компанияга босим ўтказгани сабаб қилиб кўрсатилмоқда. Бу ҳақда BBC хабар берди.
Оқ уйга кўра, янги сармоя маҳаллий ишлаб чиқаришни кенгайтириш, хусусан, Apple маҳсулотлари учун эҳтиёт қисмларини АҚШда ишлаб чиқаришга туртки бўлади. Сармоя Apple’нинг илгари ваъда қилган 500 миллиард долларлик 4 йиллик инвестициясига қўшимча бўлиши айтилган.
Трамп ва Тим Кук Оқ уйда 6 август куни ўтказилган расмий маросимда биргаликда чиқиш қилган. АҚШ президентига кўра, янги сармоя доирасида Apple Қўшма Штатлардаги етказиб берувчилар билан ҳамкорликни кенгайтиради, мамлакат бўйлаб янги маълумот марказлари қуради. Кентукки штатида эса iPhone ҳамда ақлли соатлар учун “ақлли ойналар” ишлаб чиқариш йўлга қўйилади.
АҚШ раҳбари бу қарорни олқишлаб, компания ушбу режалар туфайли 100 фоизлик бож ставкасидан қутулиб қолганини билдирган. Шу билан бирга, у бошқа корхоналар ҳам мамлакат иқтисодига сармоя киритса, солиқлардан озод бўлиши мумкинлигини, таъкидлаган.
Тим Кук бу орада Apple’нинг олдинги киритган 500 миллиард долларлик инвестицияси аллақачон натижа бераётганини айтган. Унинг сўзларига кўра, янги инвестиция Apple маҳсулотларида ишлатиладиган муҳим компонентларни айнан Қўшма Штатларда ишлаб чиқаришга хизмат қилади. У, шунингдек, Трампга Овал офисда ўз қўли билан яратган шиша ҳайкалчани туҳфа қилган.
Трамп илгари Apple’ни бевосита тилга олиб, агар iPhone телефонларини ишлаб чиқариш АҚШга кўчирилмаса, компания маҳсулотларига бож ставкалари оширилишини айтганди. Apple раҳбари Тим Кук ўтган ҳафта ушбу мажбуриятларни тилга олиб, компания бу борада янада кўпроқ режалар тузаётганини маълум қилган. Айни пайтда, Apple’нинг акциялари инвестиция хабари ортидан 5 фоиздан кўпроққа ошгани қайд этилган. Оқ уй бу воқеани Трамп сиёсатининг ютуғи деб атамоқда:
“Бугунги эълон — ишлаб чиқариш саноатимиздаги навбатдаги ғалаба. У АҚШ иқтисодиёти ва миллий хавфсизлигини ҳимоя қилишга хизмат қилади”.
Apple Трамп президентликка қайтганидан бери янги тариф сиёсати сабаб таъминот занжири тизимини қайта кўриб чиқмоқда. Компания маҳсулотларини Хитой ўрнига Ҳиндистон ва Вьетнам орқали етказиб бермоқда. Шунга қарамай, компания июнь ойигача бўлган 3 ой ичида савдо тарифлари сабабли мамлакатга 800 миллион доллардан ортиқ бож тўлаган.
Изоҳ (0)