АҚШ Федерал қидирув бюроси (ФҚБ) Техас штатида яшовчи Анас Саиднинг ҳибсга олингани ҳақида хабар берди.
У ўз уйини ИШИД аъзоларига бошпана қилиб берганликда ва терактга тайёргарлик кўрганликда айбланмоқда.
Федерал қидирув бюроси ҳисоботида таъкидланганидек, Анас Саид 8 ноябрь куни ҳибсга олинган. Унинг уйи ва машинасида тинтувлар ўтказилган, ҳуқуқ-тартибот идоралари ходимлари унинг телефонини ҳам кўздан кечирган. Associated Pressнинг (AP) хабар беришича, суд бугун, 15 ноябрь куни бошланган.
Суд ҳужжатларида қайд этилишича, Анас Саид ИШИД фаолиятини давом эттиришга чақирувчи видеороликлар тайёрлаган. Уларда у 2001 йил 11 сентябрдаги терактга ўхшаш терактда иштирок этмоқчи эканини ҳам таъкидлаган.
Прокурорларнинг айтишича, айбланувчи портловчи моддалар ясашни ва уяли телефонларни масофавий детонаторга айлантиришни ўрганган. У Ҳьюстон шаҳрида теракт содир этишни режалаштирган. Анас Саид 20 йилгача қамоқ жазоси ва 250 минг доллар жаримага тортилиши мумкин.
APнинг аниқлик киритишича, Анас Саид Ливанда туғилган.
2011 йил 11 сентябрдаги теракт
2001 йил 11 сентябрь куни “Ал-Қоида” террорчилик гуруҳи жангарилари тўртта режалаштирилган йўловчи самолётини олиб қочди. Террорчилар улардан иккитасини Жаҳон савдо ташкилотининг осмонўпар эгизак биноларига олиб бориб урган. Яна бир самолёт Пентагон биносига қулаган, тўртинчиси эса Пенсилваниядаги далага қулаган.
Ҳужумлар оқибатида 2,9 минг киши ҳалок бўлган. 11 сентябрдаги теракт қурбонлар сони бўйича тарихдаги энг йирик теракт ҳисобланади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)