Geely компанияси Хитойда ўтказган халқаро медиатурда ўзбекистонлик журналистлар ҳам қатнашди

Жорий йил 11–13 ноябрь кунлари Geely компанияси Хитойда 10 дан ортиқ давлатдан келган журналистлар учун медиатур ташкил этди. Тадбирда ўзбекистонлик оммавий ахборот воситалари вакиллари ҳам қатнашди, дея хабар берди “Дарё” мухбири.

2025 йилда Хитойнинг Geely компанияси Ўзбекистонда ўз автомобиллари савдосини бошламоқчи. Маълум қилинишича, сотувга электромобиллар ва гибрид моделлар чиқарилиши режалаштирилган.

Медиатур иштирокчилари дастлаб Geely Holding Group’нинг Жиангсу провинцияси Вухи шаҳрида жойлашган InfiMotion шўба корхонасида бўлди. Корхона электромобиль тизимлари ва компонентларини ишлаб чиқаришда етакчилардан саналади. У 2021 йилда очилган.

InfiMotion штаб-квартирасида асосий илмий-тадқиқот маркази ва ишлаб чиқариш заводи жойлашган. Компания Вухидан ташқари Шанхай, Нингбо ва Швециянинг Готҳенбург шаҳарларида замонавий илмий-тадқиқот марказларини бошқаради. Жами мингдан ортиқ мутахассислардан иборат иқтидорли ходимлар автомобиль соҳасида янги инновациялар қилади.

InfiMotion дунёга машҳур Lotus, Zeekr, Lynk аnd Cо ва Geely каби брендлари учун эҳтиёт қисмлар ишлаб чиқармоқда.

Медиатур давомида мутахассислар журналистларга InfiMotion томонидан янги яратилган “11-in-1” “ақлли” технология ҳақида сўзлаб берди. Бу электромобиль имкониятларини оширувчи, ҳайдовчига янада қулай шароит яратувчи тизимдир. “11-in-1” муҳим компонентлар ҳисобланган — двигатель, инвертор, узатиш ва совитиш тизимларини битта ихчам пакетга бирлаштириши билан аҳамиятли.

Анъанавий электромобилларида ушбу компонентларнинг ҳар бири алоҳида ишлайди. Бироқ битта блокка интеграция қилинган тизим қатор афзалликларни беради. Масалан, бунда электр сарфи камаяди ва электромобиль “заряди” узоқроқ масофага етади. Шу билан бирга, янги технология транспорт воситаси вазнини сезиларли енгиллашишига хизмат қилади.

Янги технологиянинг энг муҳим хусусияти шундаки, бир нечта компонентларни интеграциялаш ишлаб чиқариш харажатларини кескин камайтиради. Бу эса автомобиль нархи арзонлашишига олиб келади.

Энг сўнгги модел бўлган Geely EХ5 электромобили ҳам “11-in-1” технологияси билан жиҳозланган. Транспорт воситасининг янги батареялари совуққа жуда чидамли бўлиб, -30 даража ҳароратда ҳам нормал ишлаши айтилди.

Журналистларнинг кейинги манзили Geely Holding Group’нинг Чжежианг провинцияси Нингбо шаҳридаги Тадқиқотлар ва ривожланиш маркази бўлди.

Марказ 2003 йилда ташкил этилган. У ерда автомобиллар дизайни устида ишланади, транспорт воситалари ва эҳтиёт қисмларининг чидамлилик ҳамда хавфсизлик синовлари ўтказилади. Умуман олганда, муассаса автомобилларнинг бошланғич концепциясидан тортиб то якуний ишлаб чиқаришгача бўлган барча қиймат занжирини қамраб олади.

Марказда 13 000 нафардан ортиқ иқтидорли ходимлар ишлайди. Уларнинг 7 000 нафари транспорт воситаларининг илмий-тадқиқот ишлари билан шуғулланади.

Марказда амалга ошириладиган муҳим ишлардан бири автомобиллар ва уларнинг барча деталлари чидамлилиги ҳамда хавфсизлигини синовдан ўтказишдир.

Дунёнинг турли нуқталаридан келган оммавий ахборот воситалари вакиллари марказда олиб борилаётган тадқиқотлар, автомобилларни синаш жараёнларини кузатди.

Журналистлар билан мулоқотда айтилишича, охирги 10 йилда Geely Аuто Group ҳолдинг компанияси илмий-тадқиқот ишларига 200 миллиард юандан (27,7 миллиард доллар) ортиқ маблағ сарфлади.

Бугунги кунда компания Geely, Lynk&Co, Zeekr, Volvo Cars, Polestar, Proton, Smart ва Lotus каби брендлар остида автомобиллар ишлаб чиқаради. Ҳолдингда 300 минг нафарга яқин ходим ишлайди.