Макроиқтисодий ва ҳудудий тадқиқотлар институти мутахассислари томонидан иқтисодий фаоллик даражасини баҳолаш ва прогноз қилиш учун республика автомобиль бозоридаги фаоллик даражаси таҳлил қилинди.
III чоракдаги вазият
2024 йилнинг III чорагида Ўзбекистон автомобиль бозорида фаоллик даражаси ошган бўлсада, 2023 йилги даражада эмас. Хусусан, июль сентябрь ойларида давлат рўйхатидан ўтказилган автомобиллар сони 352,8 мингтани ташкил қилиб, II чоракдагига нисбатан 76,8 мингтага (27,8 фоизга) кўпайди. Бироқ, бу кўрсаткич 2023 йилнинг мос давридагига нисбатан 19,9 фоиз кам.
Таҳлиллар тижорат банклари томонидан ажратилган автокредитлар ва аҳолининг тасарруфдаги даромадлари автомобиль бозоридаги фаоллик даражасига таъсир этувчи муҳим омиллардан бири эканлигини кўрсатди. Хусусан, 2021 йил январь ойидан 2024 йил сентябрь ойигача бўлган даврда давлат рўйхатидан ўтказилган автомобиллар сони ва аҳолига ажратилган автокредитлар ҳажми ўртасида (корреляция коэффициенти = 0,72), шунингдек, аҳоли даромадлари ва автомобиллар савдоси ўртасида (корреляция коэффициенти = 0,42) мавжудлиги аниқланди.
Автокредитлар бўйича ҳолат
2024 йилнинг дастлабки 9 ойида банклар томонидан аҳолига жами 12,8 трлн сўм миқдорида автокредитлар ажратилган бўлиб, 2023 йилнинг мос давридагига нисбатан 2,4 баробарга камайган. Биргина III чоракда ажратилган автокредитлар II чоракдагига нисбатан 16,9 фоизга ва 2023 йилнинг мос давридагига нисбатан 3 баробарга камайган.
Таҳлилларга кўра, ажратилган кредитларнинг ўсиш суръати сўнгги 3 йилдаги ўртача даражада сақланиб қолса, йил охирига қадар ҳар ойда ўртача 115—118 мингта автомобиль давлат рўйхатидан ўтказилиши кутилмоқда.
Маълумот учун, 2023 йилнинг IV чорагида ҳар ойда ўртача 154,8 мингта автомобиллар олди-сотдиси бўйича шартнома имзоланган.
Автокредитларнинг сезиларли даражада камайиши шароитида, автомобиль корхоналари ва дилерлар томонидан айрим автомобиллар савдолари учун чегирмаларнинг киритилиши, фоизсиз муддатли тўловларнинг жорий этилиши бозорда ўтган йиллар даражасидаги талабни қўллаб-қувватлашга қаратилган чоралар сифатида қаралиши мумкин.
Автомобиль бозори қандай ҳолатда?
Аввалроқ Ўзбекистонда 2024 йил октябрида автомобиль бозорида сотувлар яна пасайгани айтилган эди. Октябрь ойида автотранспорт воситаларининг савдоси 102,3 минг донани ташкил этди, бу ўтган ойга нисбатан 7 фоизга кам. Йиллик кўрсаткичда эса пасайиш — 44 фоиздан кўпроқ.
Изоҳ (0)