Geely kompaniyasi Xitoyda o‘tkazgan xalqaro mediaturda o‘zbekistonlik jurnalistlar ham qatnashdi

Joriy yil 11–13-noyabr kunlari Geely kompaniyasi Xitoyda 10 dan ortiq davlatdan kelgan jurnalistlar uchun mediatur tashkil etdi. Tadbirda o‘zbekistonlik ommaviy axborot vositalari vakillari ham qatnashdi, deya xabar berdi “Daryo” muxbiri.

2025-yilda Xitoyning Geely kompaniyasi O‘zbekistonda o‘z avtomobillari savdosini boshlamoqchi. Maʼlum qilinishicha, sotuvga elektromobillar va gibrid modellar chiqarilishi rejalashtirilgan.

Mediatur ishtirokchilari dastlab Geely Holding Group’ning Jiangsu provinsiyasi Vuxi shahrida joylashgan InfiMotion sho‘ba korxonasida bo‘ldi. Korxona elektromobil tizimlari va komponentlarini ishlab chiqarishda yetakchilardan sanaladi. U 2021-yilda ochilgan.

InfiMotion shtab-kvartirasida asosiy ilmiy-tadqiqot markazi va ishlab chiqarish zavodi joylashgan. Kompaniya Vuxidan tashqari Shanxay, Ningbo va Shvetsiyaning Gothenburg shaharlarida zamonaviy ilmiy-tadqiqot markazlarini boshqaradi. Jami mingdan ortiq mutaxassislardan iborat iqtidorli xodimlar avtomobil sohasida yangi innovatsiyalar qiladi.

InfiMotion dunyoga mashhur Lotus, Zeekr, Lynk and Co va Geely kabi brendlari uchun ehtiyot qismlar ishlab chiqarmoqda.

Mediatur davomida mutaxassislar jurnalistlarga InfiMotion tomonidan yangi yaratilgan “11-in-1” “aqlli” texnologiya haqida so‘zlab berdi. Bu elektromobil imkoniyatlarini oshiruvchi, haydovchiga yanada qulay sharoit yaratuvchi tizimdir. “11-in-1” muhim komponentlar hisoblangan — dvigatel, invertor, uzatish va sovitish tizimlarini bitta ixcham paketga birlashtirishi bilan ahamiyatli.

Anʼanaviy elektromobillarida ushbu komponentlarning har biri alohida ishlaydi. Biroq bitta blokka integratsiya qilingan tizim qator afzalliklarni beradi. Masalan, bunda elektr sarfi kamayadi va elektromobil “zaryadi” uzoqroq masofaga yetadi. Shu bilan birga, yangi texnologiya transport vositasi vaznini sezilarli yengillashishiga xizmat qiladi.

Yangi texnologiyaning eng muhim xususiyati shundaki, bir nechta komponentlarni integratsiyalash ishlab chiqarish xarajatlarini keskin kamaytiradi. Bu esa avtomobil narxi arzonlashishiga olib keladi.

Eng so‘nggi model bo‘lgan Geely EX5 elektromobili ham “11-in-1” texnologiyasi bilan jihozlangan. Transport vositasining yangi batareyalari sovuqqa juda chidamli bo‘lib, -30 daraja haroratda ham normal ishlashi aytildi.

Jurnalistlarning keyingi manzili Geely Holding Group’ning Chjejiang provinsiyasi Ningbo shahridagi Tadqiqotlar va rivojlanish markazi bo‘ldi.

Markaz 2003-yilda tashkil etilgan. U yerda avtomobillar dizayni ustida ishlanadi, transport vositalari va ehtiyot qismlarining chidamlilik hamda xavfsizlik sinovlari o‘tkaziladi. Umuman olganda, muassasa avtomobillarning boshlang‘ich konsepsiyasidan tortib to yakuniy ishlab chiqarishgacha bo‘lgan barcha qiymat zanjirini qamrab oladi.

Markazda 13 000 nafardan ortiq iqtidorli xodimlar ishlaydi. Ularning 7 000 nafari transport vositalarining ilmiy-tadqiqot ishlari bilan shug‘ullanadi.

Markazda amalga oshiriladigan muhim ishlardan biri avtomobillar va ularning barcha detallari chidamliligi hamda xavfsizligini sinovdan o‘tkazishdir.

Dunyoning turli nuqtalaridan kelgan ommaviy axborot vositalari vakillari markazda olib borilayotgan tadqiqotlar, avtomobillarni sinash jarayonlarini kuzatdi.

Jurnalistlar bilan muloqotda aytilishicha, oxirgi 10 yilda Geely Auto Group holding kompaniyasi ilmiy-tadqiqot ishlariga 200 milliard yuandan (27,7 milliard dollar) ortiq mablag‘ sarfladi.

Bugungi kunda kompaniya Geely, Lynk & Co, Zeekr, Volvo Cars, Polestar, Proton, Smart va Lotus kabi brendlar ostida avtomobillar ishlab chiqaradi. Holdingda 300 ming nafarga yaqin xodim ishlaydi.