Жорий йил 24 октябрь, пайшанба куни Tesla котировкалари 11 йил ичидаги энг катта ўсишни кўрсатди, бу эса Space Х асосчиси ва Tesla эгаси Илон Маскка ўз бойлигини бир кунда 33,5 миллиард долларга ошириш имконини берди.
Х ижтимоий тармоғи эгаси дунёдаги энг бой одамлар рўйхатида биринчи ўринда турибди. 24 октябрь ҳолатига кўра, унинг бойлиги Bloomberg томонидан 270 миллиард долларга баҳоланган.
24 октябрь куни NASDAQ фонд биржасидаги асосий савдо сессиясидан сўнг электромобиль ишлаб чиқарувчи Tesla компанияси акциялари 21,92 фоизга ошиб, ҳар бир акция учун 260,48 долларни ташкил қилди. Компания котировкаларидаги бу ўсиш сўнгги 11 йил ичида рекорд кўрсаткич бўлди.
Bloomberg маълумотларига кўра, Маск бойлигининг қарийб 75 фоизи Tesla акциялари ва опционлари, шунингдек, SpaceX, Х ижтимоий медиа компанияси ва сунъий интеллект компанияси хAI’даги муҳим улушларга тўғри келади.
Tesla акциялари компания 2024 йилнинг учинчи чораги учун молиявий ҳисоботини эълон қилганидан кейин кўтарилди. Компания 2023 йилнинг ёзидан бери энг катта чораклик фойда (2,2 миллиард доллар) ҳақида хабар берди. Ҳисоботдан кейинги қўнғироқ пайтида Маск Tesla электромобиллари савдоси келгуси йилда 20 фоиздан 30 фоизгача ўсишини прогноз қилди, шунингдек, Tesla Cybertruck сотуви чорак бўйича биринчи марта компания учун фойда келтираётганини айтди.
“Мен Tesla дунёдаги энг қиммат компанияга айланишини айтишим мумкин. Бу ҳолат катта фарқ билан рўй беради”, деди Маск.
Изоҳ (0)