Жорий йилнинг 9 ойи давомида бензинда ҳаракатланадиган автомобиллар импорти 28 фоизга камайган. Бу ҳақда Божхона қўмитаси хабар бермоқда.
Маълумотга кўра, енгил автомобиллар 2023 йилда 55 минг 550 дона, импорт қилинган бўлса, жорий йилда 54 минг 287 дона мамлакатга олиб кирилган. Бу ўтган йилнинг мос даврига кўра, 1263 тага кам.
Бензинда ҳаракатланувчи енгил автомобиллар жорий йилда 26 минг 246 дона импорт қилинган. Бу ўтган йилнинг мос даврига солиштирганда 10 минг 252 тага кам.
Бензин ва электрда (гибрид) ҳаракатланувчи енгил автомобиллар импорти жорий йилда 11 минг 425 дона импорт қилинган бўлса, бу ўтган йилнинг мос даврига нисбатан 49 фоизга (3 минг 775 та) ортган.
Электрда ҳаракатланувчи енгил автомобиллар импорти ҳам ортган. Жорий йилда 16 минг 209 дона электромобиль импорт қилинган бўлиб, бу ўтган йилгидан 48 фоизга (5 минг 292 та) кўп.
Рақамларга қаралса, дизелда ҳаракатланувчи енгил автомобиллар сони кескин қисқарган. Масалан, ўтган 2023 йилда 86 дона автомашина импорт қилинган бўлса, жорий йилда бу рақам 11 тага тушган.
Мототцикллар импорти эса кескин ошган. Ўтган 2023 йилда 119 минг 719 дона мотоцикл олиб кирилган бўлса, жорий йилда бу рақам 167 минг 91 тага етган.
Аввалроқ Ўзбекистонда ўтган етти йилда электромобиллар импорти 10 бараварга ошгани хабар қилинган эди.
2019 йилда Ўзбекистонга олиб кирилаётган электромобиллар божхона, акциз ва автотранспорт солиқларидан озод қилинган. 2021 йилнинг ноябрида ЙҲХББ электромобиллар учун “яшил” давлат рақамлари беришни бошлади.
Изоҳ (0)