АҚШ Сенати сайланган президент Дональд Трамп томонидан янги администрацияга кўрсатилган номзодларни имкон қадар тезроқ тасдиқлашни режалаштирмоқда.
Бу ҳақда Америка қонун чиқарувчи органининг сенатор Жон Тюн журналистларга маълум қилди.
"Биз унинг номзодларини кўриб чиқиш ва уларни иложи борича тезроқ маъқуллаш учун қўлимиздан келганини қиламиз. Янги жамоа тузилганидан сўнг улар кун тартибидаги масалаларни кўриб чиқишни бошлашади. Биз бу номзодларни маъқуллаш учун демократлардан маълум даражадаги ҳамкорликни кутамиз. Барча вариантлар батафсил кўриб чиқилади”, деди сенатор.
5 ноябрь куни бўлиб ўтган АҚШ президентлик сайловларида республикачи Трамп ғалаба қозонди. Овоз бериш натижаларига кўра, унинг партияси Сенатдаги кўпчилик ўринларни қўлга киритди ва Конгресс Вакиллар палатасини ҳам ўзида сақлаб қолади. Трамп 2025 йил 20 январда инаугурация қилинади.
Янги администрация
Трамп ўз администрациясини шакллантиришни ҳозирдан бошламоқда. Маълумотларга кўра, у янги жамоасида ашаддий исроилпарастлар бўлишини хоҳлаяпти.
Жумладан, у Мудофаа вазири лавозимига америкалик телебошловчи, Афғонистон ва Ироқдаги урушлар фахрийси, Фаластин давлатчилигига қарши фикрлари билан танилган Пит Ҳегсетни таклиф қилди.
Шунингдек, миллиардерлар Илон Маск ва Вивек Рамасвами Дональд Трамп даврида ҳукумат самарадорлигига эришиш бўйича янги департаментга раҳбарлик қилиши хабар берилди.
“Биргаликда бу икки ажойиб америкалик менинг маъмуриятим учун давлат бюрократиясини демонтаж қилиш, ортиқча қоидаларни, керакциз харажатларни камайтириш ва федерал агентликларни қайта ташкил этиш йўлини очиб беради”, деган Трамп.
Изоҳ (0)