Конгресс АҚШ президентларининг Сенат розилигисиз НАТОдан чиқишини тақиқламоқчи

АҚШ Конгресси Америка президентларига Сенат рухсатисиз ёки Конгресснинг тегишли актисиз мамлакатни НАТОдан чиқаришни тақиқловчи тузатишни маъқуллади, деб ёзади Тhе Hill.

Ташаббус муаллифлари икки сенатор – демократ Тим Кейн ва республикачи Марко Рубиодир. Улар 14 декабрь куни АҚШ Конгресси Вакиллар палатаси томонидан қабул қилинган йиллик Миллий мудофаага рухсат бериш тўғрисидаги қонун лойиҳасига тузатиш киритдилар. Тhе Hill сайти АҚШ президенти Жо Байден Конгресс томонидан тасдиқланган ҳужжатни имзолашини кутмоқда.

АҚШнинг аввалги президенти Дональд Трамп мамлакатнинг альянсдан чиқиши эҳтимоли ҳақида бир неча бор гапирган эди. У 2024 йилда бўлиб ўтадиган АҚШ президентлик сайловларида иштирок этишни режалаштирмоқда.

Унинг кампаниясида айтилишича, Қўшма Штатлар Трамп президентлиги даврида бошланган “НАТО мақсадлари ва миссиясини тубдан қайта баҳолаш жараёнини” якунлаши керак. Сўров натижаларига кўра, Дональд Трамп Аризона, Жоржия, Мичиган, Невада, Пенсилвания, Висконсин, Шимолий Каролина аҳолиси орасида машҳурлик бўйича Жо Байдендан олдинда.