АҚШнинг Аризона штатида Конгресс сайловини қайта ўтказиш керак, деди мамлакат собиқ президенти Дональд Трамп.
«Бу сайловлар шармандалик бўлди. Республикачилар сайлов кунига ҳамма нарсани тайёрлаб қўйган эди, ўша куни эса республикачиларнинг овоз санаш машиналари бузилиб қолди. Ҳеч бўлмаганда, Аризонада такрорий сайловлар ўтказилиши керак», — деб ёзади республикачи Truth Social ижтимоий тармоғида.
Трамп 12 ноябрь куни ҳам штатда такрорий сайлов ўтказилишини талаб қилиб пост ёзганди. Собиқ президентнинг сўзларига кўра, штатдаги сайловлар,«коррупционэр» амалдорларнинг ҳаракатлари туфайли «бузилган». Унинг таъкидлашича, штатнинг марказий қисмидаги Марикопа округида электрон овоз бериш машиналари ишламаган ва бу «фақат республикачилар» ҳудудларида содир бўлган.
Ноябрь ойи бошида АҚШ Конгрессининг Сенат ва Вакиллар палатасига сайловлар бўлиб ўтди. Республикачилар Вакиллар палатаси устидан, демократлар эса Сенат устидан назоратни қўлга киритди. Аризонадан демократик номзод Марк Келли сенатор бўлди, деб ёзади The New York Times. У республикачи Блейк Мастерсни 46,5 фоизга қарши 51,4 фоиз овоз билан ортда қолдирган.
Дональд Трамп 2016 йилги АҚШ президентлиги сайловларида Республикачилар партиясидан номзод бўлган эди.
Изоҳ (0)