АҚШнинг БМТдаги собиқ элчиси, Республикачилар партиясидан президентликка номзод бўлган Никки Хейли Россия активларини мусодара қилиш ва уларни Украинага ўтказиш ҳақидаги қонун лойиҳасини қўллаб-қувватлади.
У, шунингдек, сайловолди пойгасидаги рақиби, АҚШнинг собиқ президенти Дональд Трампни ҳам танқид қилди.
Bloomberg агентлигига берган интервьюсида Никки Хейли Россия президенти Владимир Путин “ўз қилмишлари учун товон тўлаши керак” деди. Шунингдек, у “НАТО масаласида Владимир Путин тарафини олган” ва “Украинадан воз кечишга тайёрлигини билдирган” Дональд Трамп ҳар бир америкаликни хавф остига қўйишини таъкидлади.
“Биз доимо урушнинг олдини олишга эътибор қаратишимиз керак. Буни амалга ошириш учун бизга ақлли президент керак”, — дея қўшимча қилди у.
АҚШ Сенатининг ташқи алоқалар қўмитаси 24 январь куни Россия активларини мусодара қилиш ҳақидаги қонун лойиҳасини қўллаб-қувватлади. 20 нафар қўмита аъзоси сўзга чиқиб, қонун лойиҳасини қўллаб-қувватлади, бир нафари эса қарши чиқди. Россиянинг мусодара қилинган активлари, жумладан, Россия банкининг музлатилган маблағлари Украинага қўшимча ёрдам сифатида тақдим этилиши тахмин қилинмоқда.
Қонун кучга кириши учун қонун лойиҳаси аввал Сенат, кейин эса Конгресс Вакиллар палатаси томонидан маъқулланиши керак. Шундан сўнг ҳужжат АҚШ президенти Жо Байден томонидан имзоланиши керак.
Изоҳ (0)