Европа дипломатияси раҳбари Жосеп Боррел Европа иттифоқига аъзо давлатларга Исроил билан мунтазам сиёсий мулоқотни тўхтатишни таклиф қилди. Бунга Исроил инсон ҳуқуқлари ва халқаро гуманитар ҳуқуқларни бузаётгани ҳақидаги ҳисоботлар асос бўлмоқда. Бу ҳақда Deutsche Welle хабар берди.
Ҳозирча Европа иттифоқи бош дипломатининг оғзаки ташаббуси 18 ноябрь куни Европа иттифоқига аъзо давлатлар ташқи ишлар вазирларининг бўлажак учрашувида муҳокама қилинади. Исроил билан сиёсий мулоқот 2000 йилда тузилган Ассоциация тўғрисидаги битим билан тартибга солинади. У томонлар ўртасидаги муносабатлар инсон ҳуқуқлари ва демократия тамойилларига ҳурматга асосланганини ҳам назарда тутади.
ЕИ давлатлари Исроил билан муносабатларни қайта кўриб чиқишга чақирди
Бир неча ой олдин Испания ва Ирландия Европа иттифоқи ҳамда Исроил ўртасидаги шериклик битимини диққат билан ўрганишни таклиф қилганди. Бир қатор дипломатларга кўра, институционал сиёсий мулоқотни тўхтатиш ассоциация тўғрисидаги битимнинг ўзини тўхтатишни англатмайди. Бироқ, бу давр мобайнида Исроил ҳукумати билан бу масалалар бўйича бирон-бир учрашув ташкил этиш тўғрисида келишувга эришилмаган.
Боррелнинг мулоқотни тўхтатиш тўғрисидаги таклифи бир овоздан маъқулланиши даргумон, чунки Венгрия ва Чехия каби давлатлар шу пайтгача Исроил тарафда бўлган. Бироқ Европа иттифоқи бош дипломати таклифи аъзо давлатлар ўртасидаги муҳокамада Исроилнинг Ғазодаги ҳаракатларига муносабат сифатида аниқ сиёсий сигнал бўлиши мумкин.
Гуманитар ташкилотлар томонидан кескин танқид
Oxfam ва Save the Children гуманитар ташкилотлари Исроилни АҚШ илгари сурган талабларга риоя қилмагани учун танқид қилган. Уларнинг икки кун аввал эълон қилинган қўшма ҳисоботига кўра, 800 минг киши “очарчиликка яқин шароитда” яшамоқда.
Ҳисоботда таъкидланишича, Исроил ўз ваъдаларини “жазосиз — Ғазодаги фаластинлик тинч аҳолига катта талафот етказган ҳолда” бузмоқда.
Ҳужжатда Исроил нафақат АҚШ томонидан қўйилган гуманитар ёрдам кўрсатиш шартларини бажармагани, балки Ғазо секторининг шимолий қисмидаги вазиятни кескин ёмонлаштиргани ҳам айтилган. Oxfam ва Save the Children каби 8 та гуманитар ташкилот Исроил ушбу талабларни бажармаганини билдирган.
Ҳуқуқ ҳимоячилари фикрича, Ғазода ёрдам етказиб беришнинг тўсиб қўйилиши, аҳоли яшайдиган ҳудудларга авиазарбалар бериш ва тинч аҳолини ҳимоя қилишнинг йўқлиги инсон ҳуқуқларининг асосий меъёрларини бузмоқда. Исроил бу айбловларни рад этиб, ўз қуролли кучлари ҳаракатлари халқаро ҳуқуқ нормаларига мос эканини даъво қилади.
Изоҳ (0)