Россия президенти Владимир Путин ўз ҳукуматига уран, титан ва никел экспортига чекловлар тайёрлашни топширди. Бу ҳақда “Интерфакс” хабар берди.
Унинг сўзларига кўра, қарор Ғарб санкциялари ва чекловларига жавоб бўлади. Россия иқтисодиёти дунёда талабгир рангли металларни экспорт қилиш имкониятини қўлдан бой бериши мумкин.
Бизга бир қатор товарларнинг етказиб берилиши чекланмоқда, лекин биз ҳам маълум чекловлар — уран, титан, никел каби маҳсулотлар ҳақида ўйлаб кўришимиз мумкин. Умуман олганда, агар бу бизга зарар келтирмаса, ўйлаш мумкин — мен буни эртага қилиш керак деяётганим йўқ — ташқи бозорга нафақат мен санаб ўтган товарларни, балки бошқа айрим маҳсулотларни ҳам етказиб бериш бўйича маълум чекловлар ҳақида ўйлаб кўриш мумкин”, деди Путин.
Уран
Жаҳон уран бозорида Россия атом электр станциялари учун энг йирик ёқилғи етказиб берувчиси ҳисобланади. Май ойида АҚШ президенти Жо Байден Сенат томонидан маъқулланган Россиядан бойитилган уран импортини тақиқлаш тўғрисидаги қонунни имзолади.
Никeл
Россия никеллари аллақачон АҚШ ва Буюк Британия санкциялари остида, улар 12 апрелдан бошлаб импортга тўлиқ эмбарго қўйган. Россия дунёдаги барча никелнинг 6 фоизини ишлаб чиқаради, аммо юқори сифатли металлга нисбатан унинг улуши сезиларли даражада юқори – 14%.
Урушдан олдин “Норникел” маҳсулотларининг деярли учдан бир қисми АҚШ ва Европага экспорт қилинган, улар 2023 йилдан бошлаб импортни қисқартиришни бошлаган. S&P Global Commodity Insights маълумотларига кўра, ўтган йили унинг ҳажми урушдан олдинги даврга нисбатан 28 фоизга тушиб кетган.
Титан
Россия урушдан олдин титан бозорида тахминан 25 фоиз улушга эга бўлиб, Американинг Boeing учун жами етказиб беришнинг учдан бир қисмини, Airbus учун ярмини ва Бразилиянинг Embraer учун деярли 100 фоизини таъминлаган. Урушдан сўнг Boeing ва Airbus Россия титанидан воз кечиш режаларини эълон қилди. 2023 йилда унинг АҚШга етказиб берилиши беш бараварга (47 миллион долларгача) камайди. Европа давлатлари эса 244 миллион долларга импортни давом эттирди.
Изоҳ (0)