Дональд Трампнинг президентлик муддати тугаши билан Оқ уйдан Россиянинг АҚШдаги президентлик сайловларига аралашуви ҳақидаги ўта махфий маълумотлар сақланадиган папка ғойиб бўлди. Ўшандан бери у топилмади. Бу ҳақда манбаларга таяниб, CNN хабар берди.
Йўқотилган маълумотлар АҚШ ва унинг иттифоқчиларининг миллий хавфсизлик сирларини ўз ичига олади. CNN манбаларининг айтишича, разведка идоралари маълумотларнинг йўқолишини жуда жиддий қабул қилган ва 2022 йилда Сенат разведка қўмитаси раҳбарларига етишмаётган материаллар ва ҳукуматнинг уни қайта тиклаш бўйича ҳаракатлари ҳақида маълумот берган.
CNN суҳбатдошларининг айтишича, папкада АҚШ ва унинг НАТОдаги иттифоқчилари томонидан руслар ва рус агентлари ҳақида тўпланган, сараланмаган разведка маълумотлари мавжуд. Бундан ташқари, папкада АҚШ ҳукуматининг 2016 йилги президентлик сайловларида Трампга ғалаба қозонишида Россия ёрдам бергани ҳақидаги версиясига асос бўлган манбалар ва усуллар ҳақида маълумотлар бор эди.
Йўқолган разведка маълумотлари шу қадар махфий эдики, Конгресс аъзолари ва уларнинг ўта махфий рухсатга эга ёрдамчилари маълумотларни фақат Виржиниядаги Марказий разведка бошқармаси штаб-квартирасида ўқишлари мумкин эди.
Папка йўқолишидан аввал Федерал қидирув бюросининг Россия бўйича тергови ҳақидаги маълумотларнинг бир қисмини махфийликдан чиқаришни истаган Трампнинг буйруғига биноан Оқ уйга олиб келинган. Папка Республикачилар партияси вакиллари томонидан ўрганилиб, нашрга тайёрланган версиядан энг нозик маълумотлар кесиб ташланган. Бу жараён Оқ уй аппаратининг ўша пайтдаги раҳбари Марк Медоуз назорати остида амалга оширилган, деб хабар бермоқда CNN.
Таъкидланишича, Дональд Трамп маъмуриятининг юқори мартабали мулозимлари президентга разведка маълумотларини тарқатишига тўсқинлик қилишга уринган. Вазифасини тарк этишдан бир кун олдин Трамп папканинг аксарият мазмунини ошкор қилиш тўғрисида буйруқ чиқарган. Оқ уй ўнг қанот журналистлар ва баъзи республикачиларга тарқатилиши режалаштирилган ҳужжатнинг таҳрирланган версиясининг бир нечта нусхаларини яратган, аммо жараён тезда бекор қилинган ва юборилган нусхалар Оқ уй адвокатларининг кўрсатмаси билан шошилинч равишда олиб ташланган.
Ҳужжатнинг нашрга тайёрланган якуний варианти Жо Байден инаугурациясидан бир неча дақиқа олдин АҚШ Адлия вазирлигига топширилган. Адлия вазирлиги Трампнинг буйруғига қарамай, ҳеч қачон маълумотларни эълон қилмаган. Шу билан бирга, Оқ уйдан таҳрир қилинмаган маълумотлардан иборат папка ғойиб бўлган.
Изоҳ (0)