АҚШ Сенати Россиядан уран импортини тақиқловчи қонун лойиҳасини маъқуллади. Бу ҳақда Конгресс юқори палатасининг энергетика ва табиий ресурслар қўмитаси баёнотига таяниб, “РИА Новости” хабар берди.
Сенаторлар бу ташаббусни бир овоздан қўллаб-қувватлаган. Қонун лойиҳаси Қўшма Штатларга 2028 йилнинг январигача ушбу турдаги ёқилғини сотиб олишни давом эттириш ҳуқуқини беради. Тақиқ 2040 йилгача жорий этилган.
Ҳужжат имзолаш учун АҚШ президенти Жо Байденга юборилиши кутилмоқда.
Россия Қўшма Штатларга ураннинг энг йирик етказиб берувчиси бўлиб, мамлакатда ишлатиладиган ёқилғининг деярли тўртдан бир қисмини таъминлайди. Уран эвазига Москва ҳар йили тахминан 1 миллиард доллар олади.
2023 йил декабрида Reuters агентлиги Россия 2022 йилда уран етказиб бериш бўйича учинчи ўринда эканини ёзган эди.
Жорий йилнинг март ойида Россия уранининг Европада нархи 2013 йилдан бери энг юқори даражага кўтарилган: ҳар бир килограмм учун 1713 евро. Февраль ойида Америка статистика хизмати 2023 йилда Қўшма Штатлар Россиядан 1,2 миллиард долларга уран сотиб олгани ҳақида хабар берган. Бу статистика тарихдаги рекорд кўрсаткич ҳисобланади.
Аввалроқ Байден Қўшма Штатлар йил бошидан буён 90 кг бойитилган уран ишлаб чиқарганини маълум қилганди.
Изоҳ (0)