13 март куни АҚШ Конгрессининг Вакиллар палатаси кўпчилик овоз билан Хитойнинг ByteDance компанияси олти ой ичида Америкадаги бизнесини алоҳида компанияга айлантириши керак бўлган қонун лойиҳасини маъқуллади.
Акс ҳолда TikTok АҚШда тақиқланиши мумкин. Ўтган ҳафта Конгрессга киритилган қонун лойиҳаси муаллифларига кўра, Хитой ҳукумати TikTok’дан америкаликлар маълумотларини тўплаш, шунингдек, Қўшма Штатлардаги жамоатчилик фикрига таъсир ўтказиш учун фойдаланиши мумкин.
Вакиллар палатасининг 352 нафар аъзоси қонун лойиҳасини ёқлаб, 65 нафари қарши овоз берди. Аммо қонун лойиҳаси барибир Сенат томонидан маъқулланиши керак ва кузатувчилар таъкидлаганидек, кўплаб сенаторлар хорижий компанияларнинг фаолиятини тартибга солишнинг бундай усулларига қарши.
Америка фуқароларининг TikTok’дан фойдаланишига биринчи марта тақиқ 2020 йилда ўша пайтдаги президент Дональд Трамп томонидан киритилган эди. Маъмурият федерал тақиқни жорий этишга ҳаракат қилди, аммо TikTok томонидан бошланган суд жараёнлари бунга йўл қўймади.
Президент Жо Байден сайланганидан сўнг ушбу иловадан давлат хизматчиларининг расмий қурилмаларида фойдаланишни тақиқловчи фармон чиқарилди. Шундан сўнг АҚШнинг 34 штатлари расмийлари маҳаллий амалдорлар учун худди шундай тақиқларни қабул қилди.
Монтана штатида ҳатто барча шахсий қурилмаларга иловани ўрнатиш тақиқланган.
Шу билан бирга, февраль ойида Жо Байденнинг сайловолди штаби TikTok’да аккаунтини рўйхатдан ўтказганини ҳам таъкидлаш керак.
Изоҳ (0)