Шимолий Корея камида еттита қисқа масофали баллистик ракета учирди. Бу ҳақда Япония мудофаа вазирлиги хабар берди.
Вазирлик маълумотларига кўра, бу ракеталарнинг максимал парвоз баландлиги тахминан 100 км, масофаси эса 400 км атрофида бўлган. Аниқлик киритилишича, барча ракеталар Япониянинг эксклюзив иқтисодий зонасидан ташқарида, Корея яримороли яқинидаги Япон денгизига тушган.
“КХДР мамлакатнинг ғарбий қирғоғидан шимоли-шарқий томонга бир нечта қисқа масофали баллистик ракеталар учирди. Тахминимизча, бу ракеталарнинг камида еттитаси максимал 100 км баландликда 400 км масофага учган”, дейилади Япония ҳукумати баёнотида.
Япония ҳарбий идораси 31 октябрь куни ҳам Шимолий Корея қитъалараро баллистик ракета учиргани ҳақида хабар берганди.
“Япония АҚШ, Жанубий Корея ва бошқа давлатлар билан яқин ҳамкорликда зарур маълумотларни тўплаш ва таҳлил қилишни давом эттиради”, деди Япония Вазирлар Маҳкамаси бош котиби Ёсимаса Хаяси
Унинг таъкидлашича, “парвоз мақсадлари ҳақида аниқ жавоб бериш қийин”. Қолаверса, Хаяси ушбу хатти-ҳаракатлар АҚШдаги президентлик сайловларига алоқадорлиги аниқ эмаслигини қўшимча қилган.
Изоҳ (0)