Шимолий Корея 12 соат ичида иккинчи баллистик ракетасини учирди, деб хабар бермоқда Жанубий Корея Қуролли кучлари штаб бошлиқлари бирлашган қўмитаси. Ракета Пхеньян яқинидаги ҳудуддан денгиз томонга учирилган.
Шимолий Корея баллистик ракета учиргани ҳақидаги маълумотни Япония Мудофаа вазирлиги ҳам тасдиқлади. Япония қирғоқ хавфсизлиги маълумотларига кўра, ракета учирилганидан бир соат ўтиб Хоккайдо ғарбида денгизга қулаган. Шимолий Корея ракетаси тахминан 6 000 километр баландликда учди, унинг парвоз масофаси 1 000 километр эди, деб кейинроқ аниқлик киритди Япония Мудофаа вазирлиги. Идора баёнотида айтилишича, Токио Пекиндаги дипломатик каналлар орқали Пхеньян нинг ракета учирилиши юзасидан кескин норозилик билдирган.
Аввалроқ 17 декабрь оқшомида КХДР қисқа масофага учувчи баллистик ракетани учирганди. Жанубий Корея ҳарбийларига кўра, ракета тахминан 570 километр масофани босиб ўтган ва денгизга қулаган. Унинг учирилиши Шимолий Кореянинг собиқ етакчиси Ким Чен Ир вафотининг 12 йиллигига тўғри келди.
Қўшма Штатлар Шимолий Кореянинг баллистик ракеталар учирганини қоралади.
“Бу учиришлар БМТнинг кўплаб резолюцияларини бузади, Шимолий Кореянинг қўшниларига таҳдид солади ва минтақавий хавфсизликка путур етказади”, — дейилади Давлат департаменти баёнотида.
Изоҳ (0)