Shimoliy Koreya kamida yettita qisqa masofali ballistik raketa uchirdi. Bu haqda Yaponiya mudofaa vazirligi xabar berdi.
Vazirlik maʼlumotlariga ko‘ra, bu raketalarning maksimal parvoz balandligi taxminan 100 km, masofasi esa 400 km atrofida bo‘lgan. Aniqlik kiritilishicha, barcha raketalar Yaponiyaning eksklyuziv iqtisodiy zonasidan tashqarida, Koreya yarimoroli yaqinidagi Yapon dengiziga tushgan.
“KXDR mamlakatning g‘arbiy qirg‘og‘idan shimoli-sharqiy tomonga bir nechta qisqa masofali ballistik raketalar uchirdi. Taxminimizcha, bu raketalarning kamida yettitasi maksimal 100 km balandlikda 400 km masofaga uchgan”, deyiladi Yaponiya hukumati bayonotida.
Yaponiya harbiy idorasi 31-oktyabr kuni ham Shimoliy Koreya qit’alararo ballistik raketa uchirgani haqida xabar bergandi.
“Yaponiya AQSH, Janubiy Koreya va boshqa davlatlar bilan yaqin hamkorlikda zarur ma’lumotlarni to‘plash va tahlil qilishni davom ettiradi”, dedi Yaponiya Vazirlar Mahkamasi bosh kotibi Yosimasa Xayasi
Uning ta’kidlashicha, “parvoz maqsadlari haqida aniq javob berish qiyin”. Qolaversa, Xayasi ushbu xatti-harakatlar AQSHdagi prezidentlik saylovlariga aloqadorligi aniq emasligini qo‘shimcha qilgan.
Izoh (0)