Шимолий Корея АҚШ, Япония ва Жанубий Кореянинг ҳарбий машғулотларига жавобан Haeil-5-23 сувости ядро қуроли тизимини синовдан ўтказди, деб хабар бермоқда Корея марказий ахборот агентлиги (KCNA) мамлакат мудофаа вазирлигига таяниб.
“КХДР Миллий Мудофаа академияси қошидаги Сувости қурол тизимлари институти Кореянинг Шарқий денгизи сувларида (КХДР Япон денгизини шундай атайди — “Дарё” изоҳи) Haeil-5-23 сувости ядро қуроли тизимининг муҳим синовини ўтказди, қурол ҳозирда ишлаб чиқиш босқичида”, — дейилади баёнотда.
Шимолий Корея Мудофаа вазирлигининг таъкидлашича, синовлар Чежу ороли атрофида бўлиб ўтган уч кунлик денгиз машқларига жавобан амалга оширилган. Уларда Американинг Carl vinson ядровий авиаташувчи кемаси, Аэгис кўп функцияли жанговар тизими билан жиҳозланган Princeton крейсери, Япония ва Жанубий Корея ҳарбий-денгиз кучларининг кемалари иштирок этмоқда.
“Ҳозирги ўқув машғулотлари минтақадаги вазиятни янада беқарорлаштиришга олиб келди, улар давлатимиз хавфсизлигига жиддий таҳдид солувчи ҳаракатлардир”, — таъкидлади КХДР Мудофаа вазирлиги.
2022 йил сентябрида Шимолий Корея парламенти “КХДРнинг ядро қуролли кучларига нисбатан сиёсати тўғрисида”ги қонунни қабул қилганди, унда мамлакат “урушнинг барча шаклларига, жумладан, ядровий қуролга қарши туриши” қайд этилган, бироқ ҳужжатда Пхеньян ядро қуролларини қўллаши мумкин бўлган бешта шарт келтирилган. Улар орасида Шимолий Кореяга ҳам ядровий, ҳам ядросиз кучлар билан ҳужум уюштирилиши бор.
Изоҳ (0)