Бирлашган Миллатлар Ташкилоти бош котиби Антониу Гутерриш Исроил бош вазири Биньямин Нетаньяхуга мактуб йўллаб, бир кун аввал қабул қилинган БМТнинг Фаластинлик қочқинларга ёрдам кўрсатиш агентлиги (UNRWA) фаолиятини тақиқловчи янги қонунга норозилик билдирди.
“Мен сизни ва Исроил ҳукуматини потенциал ҳалокатли оқибатларнинг олдини олишга ва UNRWA’га босиб олинган Фаластин ҳудудлари, жумладан, Шарқий Қуддусдаги фаолиятини халқаро ҳуқуқ доирасида давом эттиришига рухсат беришга чақираман”, дейилади Гуттериш мактубида.
Унинг таъкидлашича, “Исроил босқинчи давлат сифатида” аҳолининг эҳтиёжларини қондиришни таъминлаш учун масъул бўлиб қолиши керак.
“Агар Исроил буни уддалай олмаса, у БМТнинг ушбу мақсадлардаги фаолияти, шу жумладан, UNRWA фаолиятига рухсат беришга мажбурдир”, дея таъкидлайди БМТ бош котиби.
Исроилнинг чеклов тўғрисидаги қонуни 2023 йил 7 октябрда ҲАМАСнинг Исроилга ҳужумида UNRWA’нинг бир неча ходимлари иштирок этгани ҳақидаги маълумотлар туфайли ишлаб чиқилган.
Ушбу агентлик 2025 йилдан Исроилдаги фаолиятини тўлиқ тўхтатиши керак. Қонун лойиҳаси 28 октябрь куни Исроил парламентида 92 депутат томонидан маъқулланган.
АҚШ Давлат департаменти Исроилнинг ушбу қароридан чуқур хавотир билдириб, Ғазо шимолидаги Жабалия қочқинлар лагерига гуманитар ёрдам етиб бормаётганини ва Вашингтон бу ҳолатни қабул қилмаётганини таъкидлаган.
Буюк Британия ташқи ишлар вазири Девид Лемми Исроилнинг UNRWA’ни тақиқлашга қаратилган чора-тадбирларидан чуқур афсусдалигини айтган.
Германия, Франция, Буюк Британия, Канада, Австралия, Япония ва Жанубий Корея ҳам Исроил парламентининг қонун лойиҳаларидан “чуқур хавотир билдирган”.
Изоҳ (0)