Уйсизлик муаммосини ҳал қилиш учун “Уй-жой – ижтимоий кўмак асоси” тамойилини жорий этиш лозим. Бу ҳақда Стратегик ислоҳотлар агентлиги хабар бермоқда.
Агентлик Финляндия тажрибаси асосида уйсизлик муаммосини ҳал қилиш масалалари бўйича таклифлар тайёрланган. Лойиҳага кўра, Финляндиянинг Housing First дастурига мувофиқ уй-жой билан аввало оилалилар, кейин ёлғизлар ва сўнгра ётоқхоналарда ёки қариндошлари билан бир уйда истиқомат қиладиганлар таъминланади. Дастур доирасидан бериладиган уйларнинг ер майдони 35 квадрат метр. Дастур шартлари оддий: уй-жойга эга бўлиш учун ишга жойлашиш керак.
Бугунги кунда Ўзбекистонда ижтимоий ётоқхона уйга эга бўлмаган барча фуқароларга ижара ҳуқуқи асосида вақтинчалик тақдим этилади. Ижтимоий уйлар аёллар, ёшлар ва темир дафтарларга киритилган, нотурар жойларда истиқомат қилаётган, ўзида (шу жумладан, оила аъзоларида) мулк ҳуқуқи асосида турар жойи бўлмаган (охирги бир йил давомида ўзига тегишли бўлган турар жойни сотмаган ёки ҳадя қилмаган) хотин-қизларга тақдим этилади.
Юқоридагилардан келиб чиққан ҳолда қуйидаги таклифлар тайёрланган:
- “Уй-жой – ижтимоий кўмак асоси” тамойилини жорий этиш;
- уйларни эгаликка эмас балки ижарага бериш бозорини ривожлантириш;
- ижтимоий уйлар фаолиятини самарали ташкил қилиш мақсадида давлат-хусусий шерикчилик асосида ёки хусусий тадбиркорларга мавжуд уйларни бериш, бунда, қайта қуриш, таъмирлаш ва уйни кейинчалик бошқариш мажбуриятини юклаш ҳамда фуқароларга узоқ муддатда ижарага арзонлаштирилган нархда тақдим этишни йўлга қўйиш (ҳар бир ҳудудда рейтингни ижобий бўлган 1 тадан девелоперга ижтимоий уйларни қуриш буюртмасини бериш);
- уйларга жойлаштиришда талабгорнинг турар жойга муҳтожлик даражасини баҳолаш бўйича аниқ мезонларни тасдиқлаш, бунда фуқароларни аниқлашда кейс-менежмент усулидан фойдаланиш;
- талабгорларни уйларга жойлаштириш тизимини такомиллаштириш мақсадида фуқароларни онлайн навбатга олиш электрон платформасини жорий қилиш.
Маълумот учун, 2021 йилда уй-жой шароитларини яхшилашга муҳтож бўлган фуқаролар, шу жумладан, хотин-қизларни ижара ҳуқуқи асосида вақтинчалик жойлаштириш учун ҳокимликлар томонидан 1 000 та хонадон сотиб олинган. Тошкент шаҳрида тажриба тариқасида “Ижтимоий ҳимоя ягона реестри” даги фуқароларга ижара харажатларининг бир қисмини қоплаш учун маҳаллий бюджет маблағларидан олти ой давомида ойлик ижара тўловининг 50 фоизи миқдорида тўлаш тизими жорий қилинган.
Изоҳ (0)