«Отасиз, уйсиз яшаш осон эмас». Миллати тожик, Қозоғистон фуқароси бўлган ўзбекистонлик блогер Азода билан суҳбат (фото)

Кейинги пайтларда санъатда янги саҳифа очилганга ўхшайди. Интернет юлдузлари: вайнер ва блогерлар худди санъаткорлар каби халқ орасида машҳур. Улар кичик ижоди орқали миллионлаб кузатувчиларга эга. Ана шундай блогерлардан бири Азоданинг Instagram саҳифасини ҳам бир миллион обуначи кузатади. «Дарё» мухбири Наргизахон Муродова Азода билан интервью ташкиллаштирди.

Миллати тожик, Қозоғистон фуқароси бўлган ўзбекистонлик блогер

—  Қозоғистонда «о» ҳарфни бошқача талаффуз қилинади. Мени Ўзода деб чақиришлари ёқмагани учун исмимни Азодага ўзгартиришга қарор қилганман. Тошкентга келиб, санъат йўлини танлаганимдан кейин ҳам худди шу исмни сақлаб қолишни истадим. Чунки ўзбек санъатида Озода исмли машҳур хонанда бор.Миллатим тожик, 2020 йилгача Қозоғистонда яшаганмиз. Аммо болаликдан ўзбек тили ва урф-одатларига қизиқиш кучли бўлган. Шу боис Ўзбекистонда ижод қилишни таклиф қилишганда, жон деб рози бўлганман.

Клипга кўчган ҳаёт

— Болалигимда дадам билан онам оилавий келишмовчилик сабаб ажрашиб кетишган. Учта болани ёлғиз тарбиялаш ва боқиш онамга осон кечмаган. Дадам эса янги оила қуриб, ўзи билан ўзи овора бўлиб кетган. 2012 йил оиламиз учун ниҳоятда оғир келган. Онамни гап-сўзлар, тазйиқлар эзиб қўйган. Ўшанда онамни ҳеч ким эшитмаган.Онамнинг қийналаётганини кўриб, 12 ёшимдан унга ёрдамлашишга ҳаракат қилганман. Бош фарзанд барибир ота-онага кўмакдош бўларкан. Биз шаҳардан чеккароқ жойда яшардик. Шу боис онам билан тонг саҳарда туриб, марказга ишлаш учун келардик. Фастфуд егуликлари ва нон сотадиган ерда ишлаганмиз. Тушгача ишлаб, кейин мактабга кетардим.

Болалигимдаги энг катта қийинчилик уйсизлик билан боғлиқ. Ҳақиқатан ҳам у ерда уйимиз йўқ эди. Ижара уйда яшаш осон эмас. Аммо у кунларни қийинчилик дегим келмайди, чунки уйимиз бўлмагани билан жуда бахтли эдик. Онам камтарона бўлса-да, бахтли оила муҳитини яратиб берган.

Дадам ҳақида кўп сўрашади. Аммо шахсий ҳаётим ҳақида гапиргим келмайди. 12 ёшимда дадамдан қаттиқ ранжигандим. Онамнинг ёнини олаверганим учун жаҳл устида менга «Сендек қизим йўқ», деган гапни айтган. Бу гап кўнглимга жуда оғир ботган.

Уни санъат коллежига қабул қилишмаган

— Мактабни тамомлаган йилим ҳам Тошкентга келганман. Эстрада цирк коллежининг актёрлик бўлимига ҳужжат топширмоқчи бўлганман. Аммо ҳужжатларимни қабул қилишмаган.Ростини айтсам, яқинларим ҳам санъаткор бўлишимга қарши бўлган. Қизлар учун энг яхши мутахассислик ўқитувчилик дейишган. Шундан кейин Қозоғистондаги коллежда бошланғич синф ўқитувчилиги мутахассислиги бўйича ўқиганман. Аммо институтда ўқишга имконим бўлмаган. Лекин бир муддат мактабда ўқитувчилик қилганман.

Унга омад Ўзбекистонда кулиб боқди

— Кўпчилик мени тиктокер деб билади. Аммо 2017 йил блогерликни бошлаганимда ҳали тикток яратилмаганди. Мен асосан қозоқ ёшлари билан «КВН»ларда иштирок этардим. Ижтимоий тармоқлар учун ҳам вайнлар олардим. Қозоқ тилида бўлгани учун ўзбек кузатувчилари уларни кўрмаган бўлишлари табиий ҳол.2019 йил комик актриса Шаҳло Зоировани пародия қилиб, видеони Instagram’га жойлаганман. Ана шу видео сабаб омадим келган. Instagram’да ўзбек кузатувчиларим сони ортганидан кейин Ўзбекистонга таклиф этишган. Узоқ оилавий баҳсдан сўнг 2020 йилнинг 16 декабрь куни Ўзбекистонга келганман. Оиласидан узоқда яшаш жуда қийин. Ўшанда уйдагиларни ҳам бу ерга олиб келаман, укам билан синглимни ўқитаман, деб ният қилгандим. Ниятимга етдим.

Фирибгарлар уйнинг пулини «ухлатишган»

— Юқорида ижара уйда яшаганимизни айтиб ўтдим. Онам уй сотиб олишимиз учун Жанубий Кореяга ишлагани кетганди. Аввал ҳам ишлаган пулларимизни тўплаб уй олмоқчи бўлганмиз. Аммо фирибгар онамни чув тушуриб кетган. Катта пулдан айрилганимиз оиламиз учун стресс бўлган. Хуллас, 2021 йил омадли келди. Ишлаган пулларимни тўплаб онам учун уй сотиб олдим. Онамга қўнғироқ қилиб, айтганимда қувониб кетди.

Блогер, актриса ва энди хонанда

— Илгари Ўзбекистон давлат консерваториясида ўқишни истардим. Ҳозир бунга хоҳишим йўқ. Ўқимоқчиман, аммо бошқа мутахассисликни эгаллаш ниятидаман. Менимча, яхши актёрга шогирд тушиб, актёрлик сирларини ўрганса бўлади. Амалиёт эса ижодкорни пишитади. Қўшиқ айтишга болалигимдан қизиқаман. Аммо бу бўйича ҳам малакамни оширишим керак. Ҳозирча қўшиқларим кўп эмас. Аммо халқ талаби билан хизматларда иштирок этяпман.

Азоданинг Озодда кўнгли борми?

— «Озод Хуррамовни севасизми?» деган саволни кўп беришади. У йигитни таниганимда иккимизнинг ҳам Instagram'даги обуначиларимиз деярли «о»га тенг эди. У билан ижтимоий тармоқ орқали танишганмиз. Аммо шунча йил давомида ўртамизда дўстликдан бошқа ришта бўлмаган. Ҳаётимиз бир-бирига ўхшаб кетади, у ҳам катта қийинчиликлар билан бугунги даражага эришган. Уни ҳурмат қиламан, нафақат ижоди билан балки инсонийлиги билан ҳам мен учун қадрли.