Оиладаги низолар ва эр-хотин ўртасидаги келишмовчилик фарзандларга салбий таъсир этади. Чунки фарзандлар ҳамиша ота-оналарининг биргаликда фаровон ҳаёт кечиришларини исташади. Минг афсуски, турли сабаблар билан оилалар ажрашади, фарзандлар эса она ёки она меҳридан мосуво бўлади. Ўзбек санъати вакиллари орасида ҳам тўкис оилавий бахтни ҳис қилмаганлар кўплаб топилади.
Барчин Ғофурова: «Отам сабаб эркаклардан кўнглим қолган»
«Бахт овчиси» сериалидаги Зуля роли билан томошабинларга яхши таниш бўлган Барчин Ғофурова ҳам ота меҳридан айро яшаган. У отаси сабаб эркаклардан кўнгли қолгани ва эндиликда ҳаётида отасига ўрин йўқлигини қуйидагича изоҳлайди.
— Отам меҳрини ҳис қилишни истаганман, аммо каминани бу бахтдан мосуво қилишган. У укам иккимизни болалигимда ташлаб кетган. Аввалига ажрашишига кўпроқ онам сабабчи деб билардим. Чунки у ниҳоятда ғурурли аёл. Аммо улғайиб, ярашиш таклифи билан отамнинг олдига борганимдан кейин фикрларим ўзгарди. У янги оиласи борлиги ва бошқа болаларнинг бошини силаётгани учунми биз билан яшашни истамади. Илгари отам ўлган деб билардим. Чунки у бирор марта биздан хабар олганини онам кетма-кет жарроҳлик амалиётини бошидан кечирганда, укам ошқозон саратонига чалиниб даволатиш учун уйимизни сотганимизда ҳам, у инсон хабар олмаган.Лекин отам билан учрашганда фамилянгизда халққа таниламан, дегандим. Балки Барчин Ғофуровани телевизорда кўрганда кўнглидан нималардир ўтар, бу ёғи менга қоронғу. Аммо у инсон сабаб эркаклардан кўнглим қолган, оила қуришдан ҳам қўрқаман, — дейди актриса Барчин Ғофурова.
Нилуфар Усмонова: «Болаликда тўлиқ оилага муҳтож бўлганман»
Ўзбекистон халқ артисти Юлдуз Усмонова созанда Иброҳим Ҳакимов билан 1996 йил расман ажрашган. Уларнинг фарзанди Нилуфар Усмонова у пайтда анча улғайиб қолганди.
— Болаликдан тўкис оилага муҳтожлик сезиб яшаганман. Раъно холам ва бувим раҳматли меҳрибон бўлишса-да, барибир фарзанд учун ота-онанинг ўрни бўлакча бўлади. Шу боисдан балки оилапарвар ижодкор бўлишга, қомат ёки карьерани баҳона қилмай фарзандлар сонини орттиришга ҳаракат қилгандирман. Отамнинг ўз оиласи, онамнинг севимли турмуш ўртоғи бор. Иккисининг ҳам қарорини ҳурмат қиламан. Нима бўлган тақдир-да ҳам улар ота-онам бўлиб қолаверади. Мен ҳам турмушдан ажрашганман, бунинг қанчалар қийин эканини биламан. Ўғлим Саидаъзамхоннинг отаси раҳматли Новзода мен билан яшашни истамаган. Чунки у бешта қиз боланинг ичида ўсган ёлғиз эрка ўғил эди. Онаси ҳам худди аямдек чўрткесар аёл эди. Яшашни истамайсанми, ажраш деган. Оиламда нотинчлик бўлаётган пайтда онам «Сени истамаётган инсонга интилиб қадрингни тушурма, демак, тақдир эмас экан», деган. Нима бўлган тақдирда ҳам ақлли ўғлим учун у инсондан миннатдорман, — дейди хонанда Нилуфар Усмонова.
Бундан бир неча йил аввал ОАВда Нилуфар Усмонованинг отаси Иброҳим Ҳакимов билан интервью чоп этилган эди. Ўшанда Ҳакимов қизи Нилуфар билан муносабатлари яхши экани, доим ука-сингилларидан хабар олиб туриши, ҳатто, автомобиль совға қилганини айтган эди. Маълумот учун, Нилуфар Усмонова онаси Юлдуз Усмонованинг фамилияси билан ижод қилса-да, аслида унинг фуқаролик паспортида фамилияси Ҳакимова деб қайд этилган.
Озод Ҳуррамов: «Алишер Узоқовни отам деб билганман»
Блогер Озод Ҳуррамов ҳам ота меҳрисиз вояга етган. Онаси икки фарзандни боқишда кўплаб молиявий қийинчиликларга учрагани учун Жанубий Кореяда ишлашга ҳам мажбур бўлган.
— Ота-онам нега ажрашганини билмайман, билганим дадам бошқа аёлни танлаб хорижга кетган. Болаликдан эркак кишининг «болам» деб эркалашига, меҳр беришига зор бўлиб улғайганман. Шу гапни устозим Алишер Узоқовдан эшитганимда, бошқача бўлиб кетганман. Шунинг учун ҳам уни «отам» деб биламан. Отам биз билан муносабатларни тиклашга уринмаган. Ёлғон бўлмасин, машҳур бўлганимдан кейин мени топиб қўнғироқ қилиб, отам эканини айтди. Уч фарзандни катта қилиш учун онам муҳожирлик йўлини танлаган. У Жанубий Кореяда ертўлада яшаб ишларди. Тошкентдан уй олишимдан аввал онамга қўнғироқ қилиб: «Бўлди, Тошкентга қайтинг энди сизни мен боқаман», дедим. Онам қийналиб пул топса-да, мени ўйлаб «қийналиб қолмайсанми?» деб сўради. Энг биринчи ютуғим онамга Тошкентдан 4 хонали уй совға қилганим бўлди.Нима бўлишидан қатъи назар, отамга фарзанд бўлишдан оғринмайман. У мен билан яшашни истаса қаршилик қилмайман, — дейди блогер Озод Ҳуррамов.
Азода: «12 ёшимда дадамдан қаттиқ ранжигандим»
Блогер Азоданинг онаси ҳам фарзандларини ёлғиз тарбиялаган. У ҳаётидаги оғир кунлар ва дадасининг нима учун ранжиганини қуйидагича изоҳлайди.
— Болалигимда дадам билан онам оилавий келишмовчилик сабаб ажрашиб кетган. Учта болани ёлғиз тарбиялаш ва боқиш онамга осон кечмаган. Дадам эса янги оила қуриб, ўзи билан ўзи овора бўлиб кетган. 2012 йил оиламиз учун ниҳоятда оғир келган. Онамни гап-сўзлар, тазйиқлар эзиб қўйган. Ўшанда онамни ҳеч ким эшитмаган. Онамнинг қийналаётганини кўриб, 12 ёшимдан унга ёрдамлашишга ҳаракат қилганман. Бош фарзанд барибир ота-онага кўмакдош бўларкан. Биз шаҳардан чеккароқ жойда яшардик. Шу боис онам билан тонг саҳарда туриб, марказга ишлаш учун келардик. Фастфуд егуликлари ва нон сотадиган ерда ишлаганмиз. Тушгача ишлаб, кейин мактабга кетардим.
Болалигимдаги энг катта қийинчилик уйсизлик билан боғлиқ. Ҳақиқатан ҳам у ерда уйимиз йўқ эди. Ижара уйда яшаш осон эмас. Аммо у кунларни қийинчилик дегим келмайди, чунки уйимиз бўлмагани билан жуда бахтли эдик. Онам камтарона бўлса-да, бахтли оила муҳитини яратиб берган.
Дадам ҳақида кўп сўрашади. Аммо шахсий ҳаётим ҳақида гапиргим келмайди. 12 ёшимда дадамдан қаттиқ ранжигандим. Онамнинг ёнини олаверганим учун жаҳл устида менга «Сендек қизим йўқ», деган гапни айтган. Бу гап кўнглимга жуда оғир ботган.
Суғдиёна Азимова: «Биз ижарада, отам эса ҳашаматли уйда яшарди»
Актриса ва стилист Суғдиёна Азимова отаси билан бир кун бўлса-да яшашни, унинг меҳрини ҳис қилишни орзу қилади. Отасининг дуосини олиб турмушга чиқиш ҳам унинг катта орзуларидан бири.
— Отамни 2000 йилдан кейин кўрмаганман. Аммо у инсонни ўтган 22 йил давомида бир дақиқа ҳам ёдимдан чиқарганим йўқ. Ўғил бола отасиз ўз йўлини топиб кетади, аммо қиз болага жуда қийин экан. Эркак киши ҳал қилиши керак бўлган масалаларни ҳам ўзимга қолган, қиз бола эканимни ҳам унутиб қўйгандек бўлдим. Отам бор бўлса-да, худди у йўқдек яшаш жуда қийин. Онам отасиз катта қилаётганини билдирмасликка ҳаракат қилса-да, барибир унга осон эмаслигини ҳис қилардим. Уйимиз йўқ эди, 6 йилдан ошиқроқ ижара уйда яшадик. Ўшанда отам ҳашаматли уйда яшайди, наҳотки қизим нима қилаётган экан, қандай шароитда яшаётган экан деб, қизиқмаса деб ўйлардим. Онам иккимиз кўчада тарвуз-қовун сотган кунларимизни ҳам эслайман. Ўша пайтларда кўча-куйдан отаси билан ўтаётган қизларни кўрсам «Қанийди, менинг ҳам отам бўлса шунчалик қийналмасмидим», деб ҳаёлимдан ўтказгандим. Кейин билсам отамнинг бошқа оиласи ва фарзандлари бор экан. Ҳалигача отамнинг ҳеч бўлмаса биз билан икки соат бирга бўлишини, у билан тўкис оила бўлиб ўтиришни орзу қиламан. Тўйим куни отам дуо қилиб, қизлик уйимдан кузатиши орзуларимдан бири, — дейди актриса Суғдиёна Азимова.
Актриса ОАВга берган интервьюларидан бирида оқ кўйлак кийишдан умидини узгани ҳақида кўзларида ёш билан сўзлаб берганди.
Раъно Ортиқова: «Ўзинг ҳам иккита боланг ҳам ‘подарка’ деган»
Бошловчи ва хонанда Хуснора Шодиеванинг ота-онаси ҳам ажрашиб кетган. Унинг онаси Раъно Ортиқова нима учун икки қизи билан турмушдан ажрашгани ва тўнғич қизининг ҳаётида ҳам шу воқеа такрорланганини айтиб ўтди.
— Ҳеч бир қиз ажрашаман, фарзандларимни отасидан айро катта қиламан деб орзу қилмайди. Ажрашиш ҳақидаги қарорни бир-икки ойда қабул қилмаганман. У пайтда қизларим анча катта бўлиб қолишганди. Мен шунчаки яхши яшаш учун бир ўзим ҳаракат қилишдан, уйдан ва эрдан безиб кетишдан чарчаганман. «Иккита бола билан кимга кераксан, башарангга қара», деган ҳақоратлар кўнглимга оғир ботган. Уйимиз йўқ эди, ижарада яшардик. Қизларим ўқиши, дарсдан кейин қўшимча машғулотларга бориши учун савдо-сотиқ билан ҳам шуғулландим. Аммо бирор марта отасидан садо бўлмади. Бир марта қийналиб, ёрдам сўраганимда «Ўзинг ҳам иккита боланг ҳам подарка», деган жавобни олдим. Аммо қизларим отасига нисбатан қаҳр билан улғаймади. Отасининг ўлимидан аввал ҳам унинг олдида бўлиб, фарзандлик бурчини ато этди. Хусноранинг турмуши бўлмай бир ўғил билан эридан ажрашганида баъзилар онасининг тақдири такрорланди, деб ўйлади. Аммо мен бундай деб ҳисобламайман. Ҳар ким пешанасига ёзилганини бошдан ўтказади, — дейди тўй ва турли маданий тадбирлар ташкилотчиси Раъно Ортиқова.
Нигора Абдуллахонова: «Отамнинг янги оилали, фарзандли бўлганидан хурсандман»
«Афандининг қизлари» жамоаси аъзоси Нигора Абдуллахонова ҳам отасиз улғайган. У отасининг янги оила қурганидан ва фарзандли бўлганидан хурсанд эканини айтади.
— Ота-онам эрта ажрашиб кетган. Кейинчалик отамнинг янги оила қуриб, фарзандли бўлгани ҳақида эшитдим. Балки ким учундир гапларим носамимийдек туюлар. Аммо у инсоннинг бахтли эканидан хурсандман. Лекин кўнглимда кемтик борлигини, болаликдан ота меҳрини ҳис қилиб яшаганимни яширмайман. Анча улғайганимдан кейин отам билан учрашдим. Ҳеч бўлмаса бир марта бўлса ҳам отамни бағримга босиб, бу меҳр қанчалар ёқимли эканини ҳис қилдим. Эр-хотин бирор қарорни қабул қилишдан аввал болалари ҳақида ўйлаши керак. Чунки ота-онанинг айро яшаши уларга оғир ботади. Эркак аёлдан воз кечиши мумкин, аммо фарзандларидан айрилишга ҳаққи йўқ. Ҳаётимдаги энг оғриқли нуқта отасиз улғайганим билан боғлиқ. Бу ҳақда гап очилса дарров йиғлаб юбораман. Отасиз ўсиш қанчалар қийин эканини билганим учун ҳам фалончи ажрашибди, дейишса «Боласи йўқ эканми?» деб сўрайман. Чунки ота меҳрини кўрмай ўсадиган болалар сони ортишини истамайман, — дейди актриса Нигора Абдуллаханова.
Мавзуга доир:
- Етимликда ўтган болалигига қарамай муваффақият қозонган юлдузлар (фото)
- Ота-онасидан эрта айрилиб, етимлик азобини тотган ўзбек шоу-бизнеси вакиллари (видео)
- «Акамнинг жанозаси куни бешта тўй ўтказганман». Яқин инсони вафот этган кунда ҳам касби тақозо этадиган вазифасини адо этган машҳурлар
- Маҳмуд Намозовдан Раъно Ярашевагача. Фарзандидан бевақт жудо бўлган ўзбекистонлик санъаткорлар (видео)
- Мудҳиш йўл-транспорт ҳодисаларига учраб, омон қолган ўзбек шоу-бизнеси вакиллари (фото)
Изоҳ (0)