“Бир хонада олти киши яшаганмиз”. Зокир Очилдиев ижарага алоҳида уй ҳам ололмагани ва Жаҳонгир Отажонов клипини блоклатгани ҳақида (фото)

Қизиқчи Зокир Очилдиев Миршакар Файзуллаевга берган интервьюсида машҳурликка эришган пайтларда ҳам молиявий қийинчиликларга учрагани ва Жаҳонгир Отажонов ижодини пародия қилганидан афсуслангани ҳақида гапирди.

— Тошкентда ижодни бошлашдан аввал Самарқанд вилоятида анча танилиб қолгандик. Чунки ўша пайтда вилоят телевидениесида кўрсатувимиз бор эди. Шеригим иккимизни Самарқанд ва Жиззах вилояти томошабинлари яхши танишарди. Масъул шахслар кўрсатувимизни кўриб, “Республика телевидениесида ҳам берса бўларкан”, дейишганидан кейин Тошкентга келишга қарор қилганмиз. Илк кўрсатувимизнинг ўзиёқ машҳурликка эришган, эртаси кундан бошлаб кўчаларда таний бошлашган. Ҳатто тузукроқ кийим-бош олишга ҳам улгурмай қолганмиз. Шеригимнинг таклифи билан ўзимизга 2-3 ўлчам катта костюм-шим тиктирардик. Ўйлаб қарасам, биздан кўра кийимимизнинг эгнимизда туриши жуда кулгили эди.

Таксига пулимиз бўлмай, автобусга чиқсак, одамлар таниб қолиб “Ия сизлар ҳам автобусдан фойдаланасизларми?” дейишарди. Аслида чўнтагимизда ўша йўлкирани тўлашга ҳам пулимиз йўқ эди. Халқ танигани учун йўл пулини тўлардик, бўлмаса орқа эшикдан секингина тушиб кетардик. Чунки ҳақиқатан ҳам номимиз бор-у, пулимиз йўқ эди. Ортиқ Султоновнинг акасининг таклифи билан Чорсуда қуруқ мева сотадиган ургутликлар билан бир квартирада яшаганмиз. Бир хонада камида олтита одам ётади, биз ҳам “Бир оз сурилинглар”, деб жойлашиб олардик. Чунки алоҳида уй ижарага олишга пулимиз йўқ эди.

Шеригим иккимиз уйланган, бола-чақали одамлар эдик. Аммо уй йўқлиги сабаб иккимиз ҳам Тошкентга оиламизни олиб келмаганмиз. Йигирма бир ёшда уйланиб, бир йилдан кейин фарзандли бўлган одам эдим. Бунинг учун аёлимга раҳмат айтишим керак, ўша вазиятда мени тушунган. Рўзғорнинг бор қийинчилигини бўйнига олгани учун ҳам Тошкентда эркин ижод қилолганман. Кейинчалик пул тўплаб, Ургутдаги уйни сотиб, Тошкентдан хонадон олганмиз. Оиласи билан ижара уйда яшаб, қийинчилик кўрган инсонларни кўп учратганимиз учун бундай қилишни истамаганман. Ўйлаб қарасам, шу ёшгача қилган энг ақлли қарорим шу бўлган экан, дейди Зокир Очилдиев.

Қизиқчи Жаҳонгир Отажоновнинг қўшиғини пародия қилганидан афсуслангани ҳақида гапирди

— Жаҳонгир Отажоновнинг “Қадди баланд” деган машҳур қўшиғи бор. Шунга пародия қилиб, доллар курсининг ошиши ҳақида ҳазил қўшиқ тайёрлагандим. Одатда қайси хонанданинг қўшиғини куйласам, хурсанд бўлиб, миннатдорлик билдиришарди. Мен ҳам бундан Жаҳонгир хурсанд бўлади, деб хато ўйлаган эканман. У YouTube тармоғидан қўшиқ ва клипимни блоклатиб, қўшимчасига интервьюларида ҳам гапирган. Мен-ку индамаганман, аммо одамларнинг ўзи унга негатив ёзишганди. Мен қилган ишимдан афсусланганман, нега ҳам шу қўшиқни танладим, деб ўзимни койиганман, дейди Зокир Очилдиев.