Ражаб Адашев уй сўраб Шароф Рашидовга хат ёзгани, 13 йил ижарада турганида 10 та уй алмаштиргани ҳақида (видео)

Ўзбекистон халқ артисти Ражаб Адашев “Дарё” интернет-нашрига эксклюзив интервью берди. Интервьюни журналист Феруз Муҳаммад ташкиллаштирди.

Суҳбат давомида Ражаб Адашев узоқ йиллар уйсизлик муаммоси билан қийналгани, уй сўраб Шароф Рашидовга хат ёзгани, 13 йил ижарада яшаб, 10 та уй алмаштиргани ҳақида гапириб берди.

“Ўша пайтлари қандай қилиб уйли бўламан, деб ўйлардим”

“Биз 1964 йилдан 1977 йилгача ўн марта ижара хонадонини алмаштирдик. 1972 йилда уйландим, 1974 йилда эса иккита фарзандим туғилди. Ўшанда ҳам ижарама-ижара яшаганман, аёлим эса ёзда ҳам, қишда ҳам Ургутдаги қишлоқда яшашига тўғри келарди. Ўша пайтлари қандай қилиб уйли бўламан, деб ўйлардим.

Кейин уй масаласида Ургутда ишлайдиган узоқ қариндошимиз Латиф ака Ҳамидовдан маслаҳат сўрадим. У киши Баратбой Қобиловни топасиз ва ана шу кишидан маслаҳат сўрайсиз, деди. Худди шундай қилдим, у киши билан учрашсам, улар айтдики, “Отага уй-жойим йўқ. лекин умримнинг охиригача кино билан яшайман”, деб мактуб ёзинг деди.

Энди тасодифни қаранг, 1965 йилда Касаба уюшмасига “Менинг квартирам йўқ, квартира билан таъминлашингизни илтимос қиламан”, деб ёзган аризам қолиб кетганди.

Шароф Рашидовга хат ёзганимдан кейин “Киноактёрлар” студиясида шанбалик уюштириб, ташлаб юбориш учун ортиқча қоғозларни ҳаммасини бир ерга тўплаб қўйишган экан. Ана шу ердан 1965 йилда ёзган аризамни топиб олдим. Орадан икки-уч кун ўтиб, мени квартирага навбатда турганлар рўйхатининг тепасига чиқариб қўйишди.

Биринчи бўлиб Касаба уюшмасининг раиси Обид ака менга Қорақамишдан берилаётган уйлар манзилини бериб, “Қорақамишдан уй оласизми”, деди. Аммо бориб кўрганимда уй менга ёқмади — уй тўрт хоналик эди-ю, бироқ ҳаммаёғи очиқ экан. Кейин “у уйни рад этиб, яна бир-икки ой кутаман”, деганимдан кейин кинотеатрнинг ёнидан мана шу, ҳозир яшаётган уйим чиқиб қолди. Шу билан 1978-1979 йилларда уйни олдим: 40 йилдан буён шу уйда яшаяпмиз”.

Маълумот учун, Ражаб Адашев 1944 йил 15 июль куни Самарқанд вилояти Ургут туманида туғилган. Островский номидаги Тошкент театр ва санъат институтининг актёрлик факультетини тамомлаган. Кинодаги фаолияти 1964 йилдан бошланган. 100 дан ортиқ фильмларда рол ижро этган.

Ражаб Адашев 1993 йилда “Абдуллажон” фильмидаги “Энг яхши эркак роли учун” мукофот, 1997 йилда Ўзбекистонда хизмат кўрсатган артист, 2010 йилда Ўзбекистон халқ артисти, 2021 йилда “Дўстлик” ордени, 2022 йилда “Санъат ва маданият фидокори”, “Меҳнат фахрийси”, “Кинематография фидокори” каби унвон ва мукофотларига муносиб кўрилган.

Батафсил репортажни қуйида томоша қилишингиз мумкин.

https://www.youtube.com/watch?v=lSRYJ_PmqwY&т=3с