Фармацевтика тармоғини ривожлантириш агентлигининг собиқ директори, “Док-1 Макс” ишида айбдор деб топилиб, 18 йил муддатга озодликдан маҳрум этилган Сардор Кариевнинг фарзандлари яшаб турган уй ҳам хатланди. Бундан норози бўлган Кариевнинг хотини судга шикоят қилди.
Мазкур иш 2024 йилнинг 21 октябрь куни Тошкент туманлараро маъмурий судида кўриб чиқилиши бошланди.
Бош прокуратура ҳузуридаги Мажбурий ижро бюроси ходимининг судда маълум қилишича, бюро “Док-1 Макс”дан жабрланганларга суд томонидан белгиланган салкам 76 миллиард сўмлик товон пулларини ундириш ҳаракатини давом эттирмоқда.
“Шикоят аризасини рад қилишингизни сўрайман, сабаби бизнинг қонунчилигимизда кўрсатилганки, агар ўзининг номида битта уй бўлса, тўғри уни сотиб юборишимиз нотўғри бўлар эди. Ҳозир бу ҳолатда Кариевнинг номида иккита уй бор. Бундан ташқари, мулкий аҳволи ҳам яхши. Ундириш имкони йўқ деб қайтаришга асос ҳам йўқ”, деди судда сўз олган МИБ ходими.
Кариевлар оиласининг адвокатларидан бири МИБ ходимининг бу гапига эътироз билдириб, “Битта уй бўлса сотувга чиқариш мумкин эмас, лекин иккита-учта уй бўлса ҳаммасини олиш керак деганимас-ку?”, деди.
“Кариевнинг ўзи 18 йилга қамалди. Энди вояга етмаган уч нафар боласи ва оиласи кўчада қолиши керакми? Мулкий аҳволи яхши деб, ундирувни хотинига қаратишмоқчими? Марҳамат қамоқда ишлаётган бўлса, олаётган ойлик маошига қаратишсин”, дейди адвокат шикоят аризасини қўллаб-қувватлар экан.
Кариевлар оиласининг яна бир адвокати Сардор Кариевнинг турмуш ўртоғи хатланган мулклардан фақатгина ўзи ва болалари яшаб турган уйни қолдиришни сўраётганини билдирди.
“Майли, Кариевнинг номидаги офисни, вилоятдаги уйини хатлашингиз мумкин. Бунга эътироз йўқ”, деди адвокат.
МИБ ходими эса адвокатга “унда пулларни қаердан ундирамиз?”, дея савол берди.
Адвокатнинг эслатишича, “Док-1 Макс” жабрланувчиларига айни кунга қадар фақат Кариевнинг ҳисобидан унинг онаси томонидан тўланган 2,5 миллиард сўм берилган холос.
“Бу иш бўйича 22-23 киши судланган. Ҳозир яна қўшилди. Кариевдан бошқа бирортаси ҳали товон пулини тўламади. Жабрланувчиларга бошқа ҳеч ким ёрдам бергани йўқ”, деди у.
МИБ ходими бу саволга жавобан суд қарорига кўра, жабрланувчиларга товон пулини тўлаш судланувчиларнинг 7 нафари зиммасига юклатилганини, ундирувни айни пайтда очиқда қолган 2 нафар судланувчининг ойлик-маошига қаратишганини, уйидаги мол-мулклари хатланганини очиқлади.
“Кариевнинг аёли ва болалари яшаб турган уй хатланиб сотилса, улар кўчада қолиши керакми?”, деди адвокат томонларга юзланар экан.
Судда жабрланувчилар ҳам сўз олиб, товон пулига муҳтож эканини, ногирон бўлиб қолган болаларини даволатиш учун айни кунда уларга пул кераклигини таъкидлади. Шунингдек, соғлиқни сақлаш вазирининг жамоатчиликка айтган гапи ёлғон экани, шу сабаб ота-оналар вазир билан кўришиб, гапига аниқлик киритишни сўрамоқчилигини маълум қилди.
Суд 2024 йилнинг 5 ноябрь кунига қадар танаффус эълон қилди.
Изоҳ (0)