Фуқаро Самарқанд вилоятининг турли ҳудудларидан чорва молларининг калла, туёқ ва ичакларини тўплаб, пойтахтга олиб бориб сотмоқчи бўлган. Бу ҳақда “Постда” газетасида маълум қилинди.
Айтилишича, Қашқадарё вилоятининг Чироқчи туманида яшовчи фуқаро фойда олиш учун Самарқанд вилоятининг турли ҳудудларидан чорва молларининг калла, туёқ ва ичакларини тўплаган.
Бироқ уни сифат масаласи заррача қизиқтирмади, шу боис йиққан 1,5 тонна маҳсулотни ветеринар текширувидан ўтказмади. Камига гўштни махсус жиҳозланмаган автомашинага ортди. Юк машинасида пойтахтга йўлга отланди.
Соат 23:30 ларда Жиззах вилоятининг Ғаллаорол туманидаги блокпостида автомашина тўхтатилиб, гўшт лабораторияда текширувдан ўтказилди. Таҳлиллар гўштнинг истеъмолга яроқсиз эканини кўрсатди ҳамда калла, туёқ ва ўпкалар йўқ қилинди, дейилади хабарда.
Қўшимча қилинишича, фуқарога нисбатан маъмурий баённома расмийлаштирилиб, жаримага тортилган.
Маълумот учун, жорий йилнинг ўтган даврида кўча бозорлар, савдо шохобчалари, куш хоналар ва бошқа обектларда 989 та рейд ўтказилган. Натижада 2 тонна 638 килограмм гўшт, 1 тонна 566 килограмм сут, 475 килограмм балиқ, 598 килограмм озиқ-овқат маҳсулотлари, 631 килограмм тузлама ва 3 минг 282 дона тухум савдодан олинган.
Махсус жиҳозланмаган автоуловларда ташилаётган 15 тонна 61 килограмм гўшт ушлаб қолинган. Қонунбузар 16 нафар шахсга нисбатан маъмурий жарималар белгиланган.
Изоҳ (0)