Тошкент вилоятида келиб чиқиши номаълум бўлган тўрт қоп сифатсиз гўшт маҳсулотлари йўқ қилинди

9 июль куни Тошкент вилояти ИИББ Патруль-пост хизмати ва жамоат тартибини сақлаш бошқармаси Карантин тадбирларини таъминлаш бўлинмаси ходимлари томонидан сифатсиз гўшт маҳсулотлари йўқ қилинди. Бу ҳақда вилояти ИИББ ахборот хизмати хабар берди.

Маълум қилинишича, Янгийўл тумани «Ниёзбош» маҳалласи М.Каримов кўчаси рақамсиз уйда яшовчи 1983 йилда туғилган А.Т. хонадонида ветеринария мутахассислари билан биргаликда уй ҳайвонларини профилактик эмлаш мақсадида кирилган ва хонадоннинг молхонаси ёнидаги бўш хонада тўртта қопда келиб чиқиши номаълум бўлган гўшт маҳсулоти борлиги аниқланган.

Фуқаро Т.А.дан келиб чиқиши номаълум бўлган гўшт маҳсулотларини нима сабабдан сақлаётгани сўралганда у балиқ боқишуни ва гўшт маҳсулотини балиқларга беришини маълум қилган.

Ушбу келиб чиқиши номаълум бўлган гўшт маҳсулотларини Янгийўл тумани «Э.Қовунчи» маҳалласи ҳудудида жойлашган чиқинди йиғиш майдонига олиб борилиб, ветеринария мутахассислари иштирокида ёқиш йўли билан йўқ қилинган.

Фуқаро А.Т.га нисабтан ветеринария-санитария қоидаларига зид равишда гўшт маҳсулотини сақлагани учун ветеринария ходимлари томонидан Маъмурий жавобгарлик тўғрисидаги кодекснинг 109-моддасига (ветеринария, ветеринария-санитария қоидалари ва нормаларини бузиш) асосан маъмурий баённома расмийлаштирилган.

Аввалроқ Чорсу бозорида сифатсиз гўшт маҳсулотлари сотиш билан шуғулланиб келаётган шахс аниқлангани, Қаршидан Тошкентга 500 килога яқин номаълум ҳайвонга тегишли гўшт олиб кетилаётгани автомобиль тўхтатилгани, Бухорода қўлбола тайёрланган истеъмолга яроқсиз ёғ маҳсулотини сотаётган шахс қўлга олингани ҳақида хабар берилганди.