Қашқадарёдан Тошкентга 156 кг сифатсиз гўшт маҳсулоти олиб кетаётган Lacetti ҳайдовчиси ушланди
Сирдарё туманида истеъмолга яроқсиз гўшт маҳсулотлари муомалага киритилишининг олди олинди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Сирдарё вилоят бошқармаси томонидан ИИБ ходимлари билан ҳамкорликда терговга қадар текширув ўтказилган. Унда Сирдарё туманидаги ЙПХ масканида Қашқадарё—Тошкент йўналиши бўйича ҳаракатланиб келаётган фуқаро М.Х.нинг Lacetti автотранспорт воситаси тўхтатиб кўздан кечирилган. Натижада ушбу автомашина юк хонасида 156 килограмм истеъмолга яроқсиз мол гўштини Тошкент шаҳридаги деҳқон бозорига ўтказиш мақсадида олиб кетаётгани аниқланиб, ашёвий далил сифатида олинган.
Ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилган. Ҳозирда тергов ҳаракатлари ўтказилмоқда.
