Статистик маълумотларга кўра, дунё аҳолиси ўртача умр кўриш давомийлигининг умумий кўрсаткичи ошиб бормоқда. Бунга ривожланиб бораётган тиббиёт, ҳаёт тарзи ва сифатининг ошиши ва соғлом озиқ-овқат маҳсулотлари сабаб бўлмоқда. Шу билан бирга аҳолининг тобора кам ҳаракат қилиши, атрофдагилар билан мулоқотни чеклаши ҳамда қайта ишланган, консервантларга тўла маҳсулотлар истеъмол қилиши туфайли инсоният умри қисқариб бормоқда.
Қуйида узоқ умр кўришга тўсқинлик қиладиган ва қариш жараёнини тезлаштирадиган озиқ-овқат маҳсулотлари ҳақида сўз боради.
- Пицца
Фаст-фуд кафеларида тайёрланадиган пицца таркибидаги соуслар жуда кўп туз ва шакарни ўзида сақлайди. Танадаги ортиқча натрий (туз) юрак хуружи ва ошқозон саратонига олиб келади. Шакар эса атиги бир соатга етадиган энергияни беради ва инсулин резистентликни ошириб юборади, бу эса қанд касаллиги ва семиришга олиб келади.
Пиццанинг яна бир хавфи ундаги колбаса маҳсулотларидир. Ҳеч кимга сир эмаски, колбасалар ҳайвон танасининг ёқимсиз қисмларидан тайёрланади. Унга хушбўйлик, ранг ва таъм бериш учун консервант ва бўёқлар қўшилади. Бундай маҳсулотлар генларнинг тузилишини ўзгартиради ва хавфли касалликларга олиб келади.
- Макарон
Майдаланган дондан тайёрланадиган макарон маҳсулотлари рафинадланган шакарга ўхшайди. Улар кам энергия беради, ошқозонда ноқулайлик келтириб чиқаради ва ортиқча вазнга сабаб бўлади. Макарон таркибида лектинлар мавжуд бўлиб, улар углеводларни бир-бирига “ёпиштирувчи” оқсил ҳисобланади. Инсон организмни лектинларга мослашмагани учун уларни соғлиқ учун таҳдид сифатида қабул қилади. Натижада иммун тизими лектинларни йўқ қиладиган антитаначаларни ишлаб чиқаради. Кўп миқдорда сифатсиз макарон истеъмол қилиш артрит, II даражали қанд касаллиги ва овқат ҳазм қилиш муаммоларига олиб келади.
Агар сиз макарондан воз кечишни режалаштирмасангиз, фақат тўлиқ донли макаронларни танланг. Улар камроқ қайта ишланади ва ичаклар учун фойдали клетчаткаларни ўз ичига олади.
- Ҳайвон оқсили
Гўшт оқсил манбайи бўлиб, уни бошқа маҳсулотлардан кўра олиш қийинроқ. Аммо гўштнинг ҳам зарари бор: ортиқча гўшт танадаги кислоталар меъёрини ошириб юборади. Шунингдек, гўшт узоқ вақт ҳазм бўлади ва унда баъзи токсинлар ҳам учрайди. Шунинг учун гўшт маҳсулотларини меъёрда истеъмол қилиш тавсия этилади.
- Картошка
Қовурилганда картошка таркибидаги шундоқ ҳам кам бўлган фойдали элементлар йўққа чиқади ва сабзавотдаги қуюқлик ўрнини ёғ эгаллайди. Сувда пишган картошка эса ўзида фойдали углеводлар, калций ва глюкоза сақлайди.
Шу билан бирга, картошкадаги оддий углеводлар қанд касаллигига чалинган инсонлар, гастрит ва ошқозон кислотаси юқори бўлган беморлар учун хавфлидир.
- Оқ нон
Оқ ун ўзида қайта ишланган донларни сақлагани учун уни оддий углевод деб аташ мумкин. Нон тўйимли бўлса ҳам энергия бермайдиган ва аксинча, чарчатадиган маҳсулотдир. Кўплаб нонларда транс ёғлар (маргарин, палма мойи), консервантлар, синтетик таъм берувчилар ва ҳид кучайтирувчи моддалар мавжуд. Улар холестерин даражасини оширади, яллиғланишни кучайтиради ва жигарни зарарлайди.
Изоҳ (0)