Жиззах вилоятининг Ғаллаорол туманида Тошкентга сотиш мақсадида олиб кетилаётган салкам 1 тонна сифатсиз гўшт тўхтатиб қолинди. Бу ҳақда вилоят ИИБ ахборот хизмати хабар берди.
Унга кўра, Ғаллаорол тумани ҳудудидаги “Сангзор-15” йўл-патрул хизмати масканида Қашқадарё—Тошкент йўналишида шубҳали ҳаракатланган Cobalt тўхтатилиб, текширилган. Қашқадарё вилояти Чироқчи туманида яшовчи, 1982 йилда туғилган фуқаро Э.Т. бошқарувидаги машинанинг юкхона ва салонида гўшт маҳсулотлари ветеринария-санитария қоидаларига зид равишда олиб кетилаётгани аниқланган.
У маҳсулотларни пойтахтга сотиш мақсадида олиб кетаётган бўлган. Соҳа ходимлари томонидан жами 820 килограмм гўшт маҳсулотлари ҳужжатлаштириб олинган. Унинг истеъмолга яроқлилигини текшириш мақсадида вақтинча музхонага жойлаштирилган. Лаборатория текширувида гўшт маҳсулотининг истеъмолга яроқсизлиги ойдинлашди. Шундан сўнг ушбу гўшт маҳсулоти тегишли тартибда ёқиб йўқ қилинди.
Изоҳ (0)