Қашқадарё вилоятида истеъмолга яроқсиз гўшт маҳсулотлари муомалага киритилишининг олди олинди, деб хабар беради вилоят ИИБ ахборот хизмати.
Маълум қилинишича, 10 май куни соат 18:10 ларда вилоят ИИБ Жамоат хавфсизлиги патрул-пост хизмати ва жамоат тартибини сақлаш бошқармаси карантин бўлинмаси ҳамда ЙҲХБ ходимлари “Умакай” мунтазам ЙПХ масканида Қарши—Тошкент йўналишида ҳаракатланиб келган Cobalt русумли автомашинани тўхтатган.
Автомашина салони ва юкхонаси кўздан кечирилганда, тегишли ветеринария ҳужжатларисиз, келиб чиқиши номаълум бўлган 929 килограмм гўшт маҳсулотлари борлиги аниқланган.
Гўшт маҳсулотларининг сифатини аниқлаш мақсадида, Қашқадарё вилоят ҳайвонлар касалликлари ташхиси ва озиқ-овқат маҳсулотлари хавфсизлиги давлат марказининг лабораториясига олиб келинган. Текширувдан ўтказилганда истеъмолга яроқсизлиги аниқланган ва тегишли тартибда йўқ қилинган.
Истеъмолга яроқсиз гўштлар савдоси
Ветеринария ва чорвачиликни ривожлантириш қўмитаси маълумотларига кўра, 2022 йилда 25,2 тонна гўшт маҳсулотлари ва 21,2 тонна сут маҳсулотлари истеъмолга яроқсиз деб топилиб, ўрнатилган тартибда йўқ қилинган.
Бундан олдинроқ Навоийда келиб чиқиши номаълум 82 кг гўшт олиб кетаётган ҳайдовчи ушлангани, Жиззахда 400 килодан зиёд сифатсиз гўшт ёқиб юборилгани, Гулистонда 250 кг истеъмолга яроқсиз гўшт олиб кетаётган ҳайдовчи ушлангани тўғрисида хабар берилганди.
Изоҳ (0)