Тошкент шаҳри Шайхонтоҳур туманида жойлашган «Эски жўва» (Чорсу) деҳқон бозорида сифатсиз гўшт маҳсулотлари аниқланди, дея хабар бермоқда Бош прокуратура ҳузуридаги департамент матбуот хизмати.
Департаментнинг Шайхонтоҳур туман бўлими томонидан туман Ветеринария бўлими ходимлари билан ҳамкорликда тумандаги «Эски жўва» деҳқон бозорида ўтказилган текширувда фуқаро Ж.Т. тегишли ҳужжатлари бўлмаган сифатсиз гўшт маҳсулотларини сотиш билан шуғулланиб келаётганлиги аниқланиб, жами 72,5 килограмм мол гўшти ашёвий далил сифатида олинган.
Мазкур ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Қаршидан Тошкентга 500 килога яқин номаълум ҳайвонга тегишли гўшт олиб кетилаётгани аниқлангани, Бухорода қўлбола тайёрланган истеъмолга яроқсиз ёғ маҳсулотини сотаётган шахс қўлга олингани ҳамда Бухородан Тошкентга 3 тоннага яқин истеъмолга яроқсиз гўшт олиб кетилаётгани аниқлангани ҳақида хабар берилганди.
Изоҳ (0)